ကြံခင်း၊ မေ ၁၂
ဧရာဝတီတိုင်းဒေသကြီး၊ ကြံခင်းမြို့နယ်အတွင်းရှိ ရပ်ကွက်၊ ကျေးရွာအုပ်စုများတွင် ကြီးကြပ်ရေး အဖွဲ့များအား တာဝန်ပေးအပ်နိုင်ရေးအတွက် ပြည်သူများအား အုပ်ချုပ်ရေးဥပဒေ၊ နည်းဥပဒေများ သိရှိနိုင်စေရန် အသိပညာပေးဆွေးနွေးဟောပြောပွဲကို မေလ ၁၁ ရက်နေ့နှင့် ၁5 ရက်နေ့အထိ မြို့နယ် အကူအညီပေးရေးအဖွဲ့များက သက်ဆိုင်ရာ အုပ်စုများအလိုက် ကွင်းဆင်းဆောင်ရွက်ခဲ့ကြသည်။
ထိုသို့ဆောင်ရွက်ရာတွင် မြို့နယ်အကူအညီပေးရေးအဖွဲ့ ၇ ဖွဲ့မှ ရပ်ကွက်၊ ကျေးရွာအုပ်စုများ သို့ သွားရောက်ပြီး၊ ဒေသခံပြည်သူများအား ရပ်ကွက်(သို့မဟုတ်)ကျေးရွာအုပ်စု အုပ်ချုပ်ရေးဥပဒေ စာအုပ်ပါ အခန်း(၁)၊ အခန်း(၃)၊ အခန်း(၄)အားလည်းကောင်း၊ နည်းဥပဒေ အခန်း(၁)နှင့် အခန်း(၂) တို့အား ဆွေးနွေးဟောပြောကြပြီး၊ ဒေသခံပြည်သူများက သိရှိလိုသည်များအား မေးမြန်းကြရာ မြို့နယ်အကူအညီပေးရေးအဖွဲ့များက ပြန်လည်ရှင်းလင်းပြောကြားခဲ့ကြသည်။
ကြံခင်းမြို့နယ်အတွင်း မြို့ပေါ်ရပ်ကွပ် (၅)ရပ်ကွက်နှင့်ကျေးရွာအုပ်စု (၃၀)အုပ်စုတို့တွင် ၅ ဦး ပါ ကြီးကြပ်ရေးအဖွဲ့ ဖွဲ့စည်းတာဝန်ပေးနိုင်စေရေး မြို့နယ်အကူအညီပေးရေးအဖွဲ့များက ကူညီ ဆောင်ရွက်ပေးသွားမည်ဖြစ်ပြီး၊ သက်ဆိုင်ရာ ရပ်ကွက်/ကျေးရွာအုပ်စုများ၏ ကြီးကြပ်ရေးအဖွဲ့များမှ အုပ်ချုပ်ရေး ဥပဒေ၊ နည်းဥပဒေများနှင့်အညီ အုပ်ချုပ်ရေးမှူးများခန့်အပ်ခြင်းနှင့် ဆယ်အိမ်မှူး၊ ရာအိမ်မှူး၊ ကျေးရွာတာဝန်ခံများအား ရွေးချယ်ခန့်အပ်သွားမည်ဖြစ်ကြောင်း မြို့နယ်အကူအညီ ပေးရေးအဖွဲ့ ထံမှသိရသည်။
ဖြိုးဝေလင်း
#MNP #News
No comments:
Post a Comment