အီရတ်မှာ အစိုးရအဖွဲ့အတွင်းက အကျင့်ပျက်အရာရှိ ဒါဇင်ပေါင်းများစွာကို စီးနင်းဖမ်းဆီး

ဇွန် - ၂၉ ( တနင်္လာနေ့ ) 

ဝန်ကြီးချုပ် အလီ အယ်လ်ဇိုင်ဒီ ရဲ့ ဝါရှင်တန်ခရီးစဉ်မတိုင်ခင် အီရတ်အစိုးရဟာ အဂတိလိုက်စားမှု တိုက်ဖျက်ရေး နှိမ်နင်းမှုကြီးတစ်ခုကို အကြီးအကျယ် စတင်လိုက်ပါတယ်။ ဒီစီးနင်းမှုတွေဟာ အီရန်ကို ကူညီနေတယ်ဆိုပြီး အမေရိကန်ဘက်က အစောကတည်းက စွပ်စွဲထားတဲ့ ရေနံဆိုင်ရာ ဒုတိယဝန်ကြီး အလီ မာရစ်ခ်ျ ကို ပစ်မှတ်ထားပြီး လုပ်ဆောင်ခဲ့တာလို့ သိရပါတယ်။

သတင်းမီဒီယာတွေက လုံခြုံရေးသတင်းမြစ်တွေကို ကိုးကားပြီး ဖော်ပြချက်အရ တနင်္ဂနွေနေ့ မနက်အစောပိုင်းမှာပဲ အထူးအကြမ်းဖက်နှိမ်နင်းရေး တပ်ဖွဲ့ဝင်တွေဟာ ဘဂ္ဂဒက်မြို့ရဲ့ လုံခြုံရေး အလွန်တင်းကျပ်ထားတဲ့ ဂရင်းဇုန် နယ်မြေထဲက အိမ်တွေကို ဝင်ရောက်စီးနင်းခဲ့ကြပါတယ်။ အဲဒီ ဂရင်းဇုန်နယ်မြေဆိုတာ အမေရိကန်သံရုံးအပါအဝင် အခြားနိုင်ငံခြားသံရုံးတွေ၊ နိုင်ငံတကာအဖွဲ့အစည်း ရုံးခန်းတွေနဲ့ အစိုးရအဆင့်မြင့်အရာရှိကြီးတွေ၊ နာမည်ကြီးနိုင်ငံရေးသမားတွေရဲ့ အိမ်တွေ ရှိတဲ့နေရာ ဖြစ်ပါတယ်။

တနင်္ဂနွေနေ့မှာ အီရတ်နိုင်ငံပိုင် INA သတင်းအေဂျင်စီက ဖော်ပြချက်အရ ဒီစီးနင်းမှုတွေအတွင်း အနည်းဆုံး အရာရှိ ၄၇ ယောက်လောက် ဖမ်းဆီးခံခဲ့ရတယ်လို့ သိရပါတယ်။ ဒါ့အပြင် ဖမ်းဆီးခံရသူတွေထဲက အမည် ၁၅ ခုပါတဲ့ စာရင်းကိုလည်း ထုတ်ပြန်ခဲ့ပြီး၊ အဲဒီအထဲမှာ "အဂတိလိုက်စားမှု စွဲချက်တွေ" နဲ့ ဖမ်းဆီးခံရတဲ့ မာရစ်ခ်ျ  လည်း ပါဝင်နေပါတယ်။

ပြီးခဲ့တဲ့ မေလတုန်းက အမေရိကန်ဟာ မာရစ်ခ်ျအပေါ်  ပိတ်ဆို့အရေးယူမှုတွေ ပြုလုပ်ခဲ့ပြီး၊ သူဟာ အီရတ်ရဲ့ ရေနံတွေကို အီရန်နဲ့ အီရန်ကျောထောက်နောက်ခံပြု အီရတ်လက်နက်ကိုင်အဖွဲ့တွေ အကျိုးအမြတ်ရအောင် လမ်းလွှဲပေးခဲ့တယ်ဆိုပြီး စွပ်စွဲခဲ့တာပါ။ ဒါ့အပြင် အီရန်ရဲ့ ရေနံတွေကို အီရတ်ရေနံတွေနဲ့ ရောနှောတာ၊ စာရွက်စာတမ်းအတုတွေ သုံးတာမျိုးတွေလုပ်ပြီး အီရန်ရဲ့ ရေနံတင်ပို့မှုကို ကူညီပေးခဲ့တယ်လို့လည်း စွပ်စွဲထားပါသေးတယ်။ အဲဒီအချိန်တုန်းကတော့ အီရတ်ရေနံဝန်ကြီးဌာနဘက်က ဒီစွပ်စွဲချက်တွေကို ငြင်းဆိုခဲ့ဖူးပါတယ်။

အီရတ်အစိုးရ ပြောရေးဆိုခွင့်ရှိသူ ဟိုက်ဒါ အယ်လ်အဘူဒီ  ကလည်း ဒီအဂတိလိုက်စားမှု တိုက်ဖျက်ရေး စီမံချက်ဟာ ဟုတ်မှန်ကြောင်း တနင်္ဂနွေနေ့မှာ အတည်ပြုပေးခဲ့ပြီး၊ ဖမ်းဆီးမှုတွေ ဆက်လုပ်နေတုန်းပဲလို့ ပြောပါတယ်။ 

အီရတ်ဝန်ကြီးချုပ်ဟာ ပြီးခဲ့တဲ့ မေလကမှ ရာထူးတက်လာခဲ့တာဖြစ်ပြီး၊ အဂတိလိုက်စားမှုကို တိုက်ဖျက်မယ့်အပြင် လက်နက်ကိုင်ဆောင်မှုကိုလည်း နိုင်ငံတော်ကပဲ တစ်ဦးတည်းအကြွင်းမဲ့ ထိန်းချုပ်ထားနိုင်ရမယ် (အီရန်ကျောထောက်နောက်ခံပြု လက်နက်ကိုင်အဖွဲ့တွေကို လက်နက်ဖြုတ်သိမ်းတာအပါအဝင်) ဆိုပြီး ကတိပြုခဲ့တာပါ။

တနင်္ဂနွေနေ့က ဖြစ်ပွားခဲ့တဲ့ စီးနင်းမှုတွေဟာ အီရန်နိုင်ငံခြားရေးဝန်ကြီး အဘတ်စ် အရတ်ဂ်ချီ  ဘဂ္ဂဒက်မြို့ကို လာရောက်တဲ့ ခရီးစဉ်နဲ့ သွားတိုးနေပါတယ်။ အဲဒီခရီးစဉ်အတွင်းမှာတော့ အီရန်ရဲ့ ထိပ်တန်းသံတမန်က သူတို့အိမ်နီးချင်းနိုင်ငံ (အီရတ်) နဲ့ ပူးပေါင်းဆောင်ရွက်မှုတွေ ပိုတိုးချဲ့ဖို့ အသင့်ရှိကြောင်းနဲ့ ဒေသတွင်း တင်းမာမှုတွေ ပိုမိုပြင်းထန်မလာအောင် တားဆီးဖို့ လိုအပ်ကြောင်းတွေကို ပြောကြားသွားခဲ့ပါတယ်။

REF: RT

#MNP #News