ဗြိတိန်မှာ ပြည်သူတွေက အပြောင်းအလဲတွေ လိုနေပြီလို့ အမေရိကန် ဒုသမ္မတ ပြော

ဇူလိုင် - ၆ (တနင်္လာနေ့)

အမေရိကန် ဒုသမ္မတ ဂျေဒီဗန့်စ် က ဗြိတိန်ဝန်ကြီးချုပ်တွေ ခဏခဏ အပြောင်းအလဲဖြစ်နေတာကို ကြည့်ရင် ယူကေရဲ့ နိုင်ငံရေးစနစ်က ပြည်သူတွေကို တော်တော်လေး စိတ်ပျက်အောင် လုပ်နေတယ်ဆိုတာ ပေါ်လွင်နေပြီး၊ သာမန်ပြည်သူတွေကလည်း တကယ့်အပြောင်းအလဲကို "အသည်းအသန် တောင့်တနေကြတယ်" လို့ သတိပေးပြောကြားလိုက်ပါတယ်။

ဗြိတိန်ရဲ့ ပြဿနာက ခေါင်းဆောင်တစ်ယောက်ချင်းစီထက် ပိုပြီးနက်ရှိုင်းပါတယ်။ ဒေးဗစ်ကင်မရွန်း၊ ထရီဇာမေ၊ ဘောရစ်ဂျွန်ဆင်၊ လစ်ဇ်ထရပ်စ်၊ ရီရှီဆူးနတ် နဲ့ ကီယာစတာမာ တို့ တစ်ယောက်ပြီးတစ်ယောက် ဆက်တိုက်ပြောင်းလဲခဲ့တာကို ကြည့်ရင် ပြည်သူတွေအတွက် ဘာမှဖြစ်ထွန်းအောင် မလုပ်ပေးနိုင်တော့တဲ့ ဒီစနစ်ကြီးတစ်ခုလုံး တော်တော်လေး ပျက်စီးယိုယွင်းနေပြီဆိုတာကို ပြနေတာပဲလို့ The Sunday Times နဲ့ အင်တာဗျူးမှာ ဗန့်စ်က သုံးသပ်ပြောဆိုသွားခဲ့ပါတယ်။

"ကျွန်တော်မြင်တာကတော့ ပြီးခဲ့တဲ့ နှစ်ပိုင်းလေးအတွင်းမှာတင် ဝန်ကြီးချုပ် ခြောက်ယောက်တောင် ပြောင်းသွားတာပဲ။ ဒါကိုကြည့်ရင် ဗြိတိန်နိုင်ငံရေးမှာ တစ်ခုခုတော့ တော်တော်လေး လွဲချော်ပျက်စီးနေပြီ၊ ပြည်သူတွေကလည်း တကယ့်ကို ထိရောက်တဲ့ စနစ်ပိုင်းဆိုင်ရာ အပြောင်းအလဲကြီးတစ်ခုကို အသည်းအသန် တောင့်တနေကြပြီဆိုတာ ပေါ်လွင်နေတယ်" လို့ ဗန့်စ်က ပြောသွားပါတယ်။

ဒါ့အပြင် ဗြိတိန်နိုင်ငံဟာ "ခေါင်းဆောင်ပိုင်းတွေရဲ့ ပျက်ကွက်မှုဒဏ်ကို တော်တော်ကြာကြာ ခံစားခဲ့ရတာ" ဖြစ်ပြီး "အခု လက်ရှိလုပ်နိုင်တာထက်မက ပိုပြီးတော့လည်း အများကြီး လုပ်နိုင်ပါသေးတယ်" လို့ သူက ဆက်ပြောခဲ့ပါတယ်။

ပါတီတွင်း အုံကြွမှုတွေ ဖြစ်ပြီးတဲ့နောက် ကီယာစတာမာက ရာထူးရပြီး နှစ်နှစ်တောင်မပြည့်သေးခင်မှာတင် ဝန်ကြီးချုပ်အဖြစ်ကော လေဘာပါတီခေါင်းဆောင်အဖြစ်ကနေပါ နှုတ်ထွက်တော့မယ်လို့ ပြီးခဲ့တဲ့လက ကြေညာခဲ့ပါတယ်။ အခုဆိုရင် မေကာဖီးလ် ကြားဖြတ်ရွေးကောက်ပွဲမှာ အနိုင်ရရှိခဲ့တဲ့ ဂရိတ်တားမန်ချက်စတာ မြို့တော်ဝန် အန်ဒီဘန်ဟမ် က သူ့နေရာမှာ အစားထိုး ဝင်ရောက်လာဖို့ ရေပန်းအစားဆုံး ဖြစ်နေပါတယ်။

ဗန့်စ်ကတော့ ဘန်ဟမ်အကြောင်း ပုဂ္ဂိုလ်ရေးအရ သိပ်မသိဘူးလို့ ပြောခဲ့ပေမဲ့ အမေရိကန်ရဲ့ "အနီးကပ်ဆုံးနဲ့ အရေးအကြီးဆုံး မဟာမိတ်နိုင်ငံ" ထဲက တစ်ခုဖြစ်တဲ့ ဗြိတိန်ကို ဘယ်သူပဲဦးဆောင်ဦးဆောင် ဝါရှင်တန် (အမေရိကန်အစိုးရ) အနေနဲ့ လက်တွဲလုပ်ဆောင်သွားမှာပါလို့ အလေးအနက် ပြောကြားခဲ့ပါတယ်။

ဗြိတိန်ဆီကနေ အမေရိကန် လွတ်လပ်ရေးကြေညာခဲ့တဲ့ အနှစ် (၂၅၀) ပြည့် အထိမ်းအမှတ်နေ့မှာတင် ထွက်လာတဲ့ ဒုသမ္မတရဲ့ ဒီမှတ်ချက်တွေဟာ ဝါရှင်တန် (အမေရိကန်) ဘက်ကနေ လန်ဒန် (ဗြိတိန်) အပေါ် တော်တော်လေး ပြတ်ပြတ်သားသားနဲ့ ပွင့်ပွင့်လင်းလင်း ဝေဖန်တိုက်ခိုက်မှုတွေ လနဲ့ချီ ဖြစ်ပွားခဲ့ပြီးတဲ့နောက်မှာ ထွက်ပေါ်လာတာပဲ ဖြစ်ပါတယ်။

REF: RT

#MNP #News