ရွှေတွေကို နိုင်ငံခြားမှောင်ခိုဈေးကွက်ထဲ မရောက်အောင် မာလီအစိုးရ ကာကွယ်နေ

ဇူလိုင် - ၆ ( တနင်္လာနေ့ ) 

အနောက်အာဖရိကနိုင်ငံတစ်ခုဖြစ်တဲ့ မာလီနိုင်ငံရဲ့ ကြားဖြတ်အစိုးရဟာ ၎င်းတို့နိုင်ငံရဲ့ အဓိကဝင်ငွေရလမ်း တစ်ခုဖြစ်တဲ့ ကဏ္ဍကို ပိုမိုတင်းကျပ်စွာ ထိန်းချုပ်ဖို့ ကြိုးပမ်းတဲ့အနေနဲ့ ရိုးရာနည်းဖြင့် ရွှေတူးဖော်မှုလုပ်ငန်းနဲ့ အခြားအဖိုးတန်ပစ္စည်းများ ကုန်သွယ်မှုကို ထိန်းချုပ်ကွပ်ကဲမယ့် နိုင်ငံတော်အဖွဲ့အစည်းတစ်ခုကို ဖွဲ့စည်းတည်ထောင်လိုက်ပါတယ်။

အဆိုပါကဏ္ဍအတွင်း အရောင်းအဝယ်ပြုလုပ်မှုတွေကို ဗဟိုကနေ ထိန်းချုပ်ပြီး ဘေးကင်းလုံခြုံမှုရှိစေဖို့ လုပ်ဆောင်မယ့် ကြိုးပမ်းချက်တွေရဲ့ တစ်စိတ်တစ်ပိုင်းအဖြစ် ပြီးခဲ့တဲ့ မတ်လတုန်းက အစိုးရအဖွဲ့ရဲ့ ဆုံးဖြတ်ချက်အပြီးမှာ အခုလို "မာလီနိုင်ငံ အဖိုးတန်ပစ္စည်းများဆိုင်ရာရုံး" ကို တည်ထောင်လိုက်ကြောင်း ဝန်ကြီးများကောင်စီက အင်္ဂါနေ့မှာ ကြေညာခဲ့တာ ဖြစ်ပါတယ်။

အခုလို လုပ်ဆောင်မှုဟာ အဖိုးတန်ပစ္စည်းတွေရဲ့ တန်ဖိုးကွင်းဆက်အပေါ် နိုင်ငံတော်ရဲ့ အချုပ်အခြာအာဏာကို ပိုမိုခိုင်မာစေဖို့ ရည်ရွယ်ပြီး၊ ၂၀၂၃ ခုနှစ် သတ္တုတွင်းဥပဒေနဲ့ ဒေသတွင်းအကျိုးခံစားခွင့်ဆိုင်ရာဥပဒေ တို့ကို အကောင်အထည်ဖော်တဲ့ လုပ်ငန်းစဉ်တစ်ခုဖြစ်တယ်လို့ အာဏာပိုင်တွေက ပြောကြားထားပါတယ်။

အစိုးရရဲ့ ထုတ်ပြန်ချက်အရ ရိုးရာနည်းနဲ့ အသေးစားရွှေတူးဖော်မှုလုပ်ငန်းဟာ မာလီနိုင်ငံရဲ့ စီးပွားရေးမှာ မဟာဗျူဟာမြောက် အရေးပါတဲ့နေရာကနေ ပါဝင်နေပြီး၊ နိုင်ငံခြားငွေ ရှာဖွေပေးခြင်း၊ အခွန်ဘဏ္ဍာငွေ ရရှိစေခြင်းနဲ့ စုစုပေါင်း ရွှေတူးဖော်ရေးလုပ်ကွက်ပေါင်း ၃၅၀ ကနေ ၄၀၀ ဝန်းကျင်မှာ ပြည်သူ ၂ သန်းခန့်အတွက် အလုပ်အကိုင် အခွင့်အလမ်းတွေကို ဖန်တီးပေးထားတယ်လို့ သိရပါတယ်။ ဒါပေမဲ့လည်း ဒီကဏ္ဍဟာ မှောင်ခိုကူးမှုတွေနဲ့ တရားဝင်မှတ်တမ်းတင်ထားတဲ့ ရွှေစီးဆင်းမှုပမာဏကြား ကွာဟချက်တွေ အပါအဝင် စိန်ခေါ်မှုတွေနဲ့ ဆက်လက်ရင်ဆိုင်နေရဆဲ ဖြစ်ပါတယ်။

ကမ္ဘာ့ရွှေကောင်စီ ရဲ့ အချက်အလက်တွေအရ မာလီနိုင်ငံဟာ အာဖရိကမှာ စတုတ္ထမြောက် ရွှေအများဆုံး ထုတ်လုပ်တဲ့ နိုင်ငံဖြစ်ပြီး၊ ပြီးခဲ့တဲ့ ၂၀၂၅ ခုနှစ်မှာ ရွှေတန်ချိန် ၈၂ ဒသမ ၉ တန် ထုတ်လုပ်နိုင်ခဲ့ကာ ဂါနာ၊ တောင်အာဖရိကနဲ့ ဘာကီးနားဖာဆို နိုင်ငံတွေရဲ့ နောက်မှာ တည်ရှိနေတာ ဖြစ်ပါတယ်။

တရားဝင် စာရင်းဇယားများအရ မာလီနိုင်ငံဟာ ၂၀၂၂ ခုနှစ်တုန်းက ရွှေတန်ချိန် ၇၂ ဒသမ ၂ တန် ထုတ်လုပ်ခဲ့ပြီး၊ အဲဒီအထဲမှာ ရိုးရာနည်းနဲ့ တူးဖော်မှုကနေ ၆ တန် ပါဝင်ခဲ့ကာ နိုင်ငံတော်ဘတ်ဂျက်အတွက် စီအက်ဖ်အေ ဖရန့် (CFA francs) ၇၆၃ ဘီလီယံ (အမေရိကန်ဒေါ်လာ ၁ ဒသမ ၂၇ ဘီလီယံ) ရှာဖွေပေးနိုင်ခဲ့ပါတယ်။ 

ဒါ့အပြင် ရိုက်တာသတင်းဌာနက မာလီအမျိုးသားစာရင်းအင်းဌာန (Instat) ကို ကိုးကားဖော်ပြချက်အရ မာလီနိုင်ငံရဲ့ ရွှေတင်ပို့မှုဟာ ပြီးခဲ့တဲ့နှစ် (၂၀၂၅ ခုနှစ်) မှာ စီအက်ဖ်အေ ဖရန့် ၂ ဒသမ ၇၅ ထရီလီယံ (အမေရိကန်ဒေါ်လာ ၄ ဒသမ ၈၁ ဘီလီယံ) ခန့်အထိ မြင့်တက်လာခဲ့ပြီး၊ အဲဒီမတိုင်ခင် ရွှေတင်ပို့မှု စီအက်ဖ်အေ ဖရန့် ၁ ဒသမ ၆၁ ထရီလီယံနဲ့ ယှဉ်ရင် အများအပြား တိုးတက်လာခဲ့တာ ဖြစ်ပါတယ်။

အခုလိုမျိုး ပြုပြင်ပြောင်းလဲမှုတွေ လုပ်ဆောင်လာတာဟာ မြို့တော် ဘာမာကို အစိုးရအနေနဲ့ သတ္တုတွင်းကဏ္ဍကနေ နိုင်ငံတော်ဝင်ငွေ တိုးပွားလာအောင် လုပ်ဆောင်ဖို့ ကြိုးပမ်းနေချိန်မှာ ပေါ်ပေါက်လာတာပါ။ 

၂၀၂၃ ခုနှစ် သတ္တုတွင်းဥပဒေအရ နိုင်ငံတော်အစိုးရနဲ့ ပြည်တွင်းရင်းနှီးမြှုပ်နှံသူတွေအနေနဲ့ နောက်ထပ်ပေါ်ပေါက်လာမယ့် သတ္တုတွင်းစီမံကိန်းအသစ်တွေမှာ အစုရှယ်ယာ ၃၅ ရာခိုင်နှုန်းအထိ ပါဝင်ပိုင်ဆိုင်ခွင့် ရရှိမှာဖြစ်တယ်လို့ သိရပါတယ်။

REF: RT

#MNP #News