လာမယ့်အပတ်ထဲမှာ ဗြိတိန်မှာ ဝန်ကြီးချုပ်အသစ် တက်ပါတော့မယ်

ဇူလိုင် - ၁၆ 

အသစ်ရွေးကောက်ခံလိုက်ရတဲ့ လေဘာပါတီ လွှတ်တော်အမတ် အန်ဒီဘန်းဟာ သည် ပါတီတွင်းက တခြားလွှတ်တော်အမတ်တွေဆီကနေ အပြတ်အသတ် ထောက်ခံမှုရရှိသွားခဲ့ပြီးနောက် လာမယ့်အပတ်အစမှာ ဘယ်သူနဲ့မှ ပြိုင်ဆိုင်စရာမလိုဘဲ ဗြိတိန်နိုင်ငံရဲ့ ဝန်ကြီးချုပ် ဖြစ်လာတော့မှာပါ။

ပြီးခဲ့တဲ့ အင်္ဂါနေ့အထိ ပါတီခေါင်းဆောင်သစ် ရွေးချယ်ဖို့ အမည်စာရင်းတင်သွင်းရမယ့် သက်တမ်းဟာ နှစ်ရက်တောင် လိုသေးပေမဲ့ မန်ချက်စတာမြို့တော်ဝန်ဟောင်း ဖြစ်သူဟာ လေဘာပါတီ လွှတ်တော်အမတ်ပေါင်း ၃၄၉ ဦးရဲ့ ထောက်ခံမှုကို ရရှိထားပြီးဖြစ်လို့ တခြားဘယ်ပြိုင်ဘက်လောင်းမှ သူ့ကို ကျော်တက်ဖို့ လုံးဝမဖြစ်နိုင်တော့တဲ့ အခြေအနေပါ။

ပါတီခေါင်းဆောင်အဖြစ် အမည်စာရင်း တင်သွင်းခံရဖို့အတွက် အနည်းဆုံး လေဘာပါတီအမတ် ၈၁ ဦး (ပါတီလွှတ်တော်အမတ် စုစုပေါင်း ၄၀၃ ဦးရဲ့ ၂၀%) ရဲ့ ထောက်ခံမှု လိုအပ်တာဖြစ်ပေမဲ့ ဘန်းဟာ ဘက်က ရရှိထားတဲ့ ထောက်ခံမှုပမာဏက အရမ်းများနေတာကြောင့် တခြား ကိုယ်စားလှယ်လောင်းတစ်ဦးကို ထောက်ခံပေးဖို့ ကျန်ရှိနေတဲ့ အမတ်အရေအတွက်ဟာ လုံလောက်မှု မရှိတော့တာပဲ ဖြစ်ပါတယ်ဗျာ။

ကုန်သွယ်ရေးသမဂ္ဂ နှစ်ခုအပါအဝင် တခြားဆက်နွှယ်နေတဲ့ အဖွဲ့အစည်းသုံးခုဆီကနေ ရယူရမယ့် ထောက်ခံချက်တွေကလည်း ပုံစံပြရုံသက်သက်နဲ့တင် အလွယ်တကူ အတည်ပြုချက် ရရှိသွားလိမ့်မယ်လို့ မျှော်လင့်ရပါတယ်။

လေဘာပါတီကို ၆ နှစ်ကြာ ဦးဆောင်ခဲ့ပြီး ဝန်ကြီးချုပ်အဖြစ် ၂ နှစ် တာဝန်ယူခဲ့တဲ့ ကီယာစတာမာ ဟာ ပြီးခဲ့တဲ့ ဇွန်လ ၂၂ ရက်နေ့က ရာထူးကနေ နုတ်ထွက်သွားခဲ့တာပါ။ အခုအခါမှာတော့ အသက် ၅၆ နှစ်အရွယ်ရှိပြီဖြစ်တဲ့ ဘန်းဟာ က ကန့်ကွက်သူမရှိ တစ်ဦးတည်းသော ကိုယ်စားလှယ်လောင်းအဖြစ်နဲ့ လာမယ့် သောကြာနေ့မှာ ပါတီခေါင်းဆောင်အဖြစ် တရားဝင် စတင်တာဝန်ယူမှာဖြစ်ပြီး တနင်္လာနေ့မှာတော့ ဝန်ကြီးချုပ် ဖြစ်လာတော့မှာ ဖြစ်ပါတယ်။

REF:  UPI

#MNP #News