ပွင့်လင်းလူ့အဖွဲ့အစည်း နဲ့ အလှူရှင်တွေ က အချိန်မရွေး အရေးယူခံရတော့မယ်လို့ ဆို

ဩဂုတ် -၃၁ ( တနင်္လာနေ့ ) 

ဂျော့ချ်ဆိုးရိုးစ် ရဲ့ ပွင့်လင်းလူ့အဖွဲ့ ဖောင်ဒေးရှင်း (OSF)၊ တောင်ပိုင်း ဆင်းရဲနွမ်းပါးမှု ဥပဒေစင်တာ နဲ့ အမေရိကန်-အစ္စလာမ္မစ် ဆက်ဆံရေးကောင်စီ (CAIR) တို့ ပါဝင်တဲ့ လက်ဝဲယိမ်း အကျိုးအမြတ်မယူတဲ့ အဖွဲ့အစည်း အတော်များများကို အခွန်ကင်းလွတ်ခွင့် ရုပ်သိမ်းဖို့ကိစ္စကို လုပ်နေတဲ့ အမေရိကန် ဘဏ္ဍာရေးဝန်ကြီး စကော့တ် ဘက်ဆန့် နဲ့ အခွန်ဌာန (IRS) တို့က နီးစပ်နေပြီလို့ ဒီကိစ္စကို သိရှိတဲ့ သတင်းရင်းမြစ်များကို ကိုးကားပြီး နယူးယောက်ခ်ပို့စ် သတင်းဌာနက  ဖော်ပြခဲ့ပါတယ်။

အမေရိကန်သမ္မတ ဒေါ်နယ်ထရမ့်ဟာ လက်ဝဲယိမ်း ပရဟိတ အဖွဲ့အစည်းတွေနဲ့ အထူးသဖြင့် OSF ကို "အကြမ်းဖက် ဆန္ဒပြမှုတွေ" ကို လှုံ့ဆော်ပေးနေပြီး နိုင်ငံကို ထိခိုက်စေတယ်လို့ စွပ်စွဲကာ အရေးယူမယ်လို့ ခဏခဏ ခြိမ်းခြောက်ခဲ့ပါတယ်။

 ပြီးခဲ့တဲ့နှစ် စက်တင်ဘာလတုန်းက လက်ယာယိမ်း လှုံ့ဆော်ရေးသမား ချာလီ ကာ့ခ်) လုပ်ကြံခံရပြီးနောက် လက်ဝဲယိမ်း အဖွဲ့အစည်းတွေ နောက်ကွယ်က ထောက်ပံ့ထားတဲ့ အန်တီဖာလှုပ်ရှားမှုကို ထရမ့်က "ပြည်တွင်း အကြမ်းဖက်အဖွဲ့အစည်း" အဖြစ် သတ်မှတ်ခဲ့ချိန်မှာ အဆိုပါ အဖွဲ့အစည်းတွေကို အရေးယူဖို့ ပိုမို အရှိန်မြင့်လာခဲ့တာ ဖြစ်ပါတယ်။

အဲဒီအချိန်တုန်းက အမေရိကန် တရားရေးဝန်ကြီးဌာန (DoJ) ဟာ OSF ကို တရားစွဲဆိုဖို့ တရားလိုရှေ့နေတွေကို ဖိအားပေးနေတယ်လို့ အမေရိကန် မီဒီယာတွေက ဖော်ပြခဲ့ကြပါတယ်။ DoJ ဟာ အကြမ်းဖက်မှုကို ရုပ်ဝတ္ထုပိုင်းဆိုင်ရာ ထောက်ပံ့မှု၊ ဆက်ကြေးတောင်း/ဂိုဏ်းဖွဲ့ ပြစ်မှု၊ မီးရှို့မှုနဲ့ ကြေးနန်း/အွန်လိုင်းမှတစ်ဆင့် လိမ်လည်မှု အပါအဝင် စုံစမ်းစစ်ဆေးနိုင်မယ့် ပြစ်မှုပုဒ်မ အမျိုးမျိုးကို အကြံပြုပေးခဲ့တယ်လို့ သိရပါတယ်။ 

အဆိုပါ ဖောင်ဒေးရှင်းကတော့ အဲဒီ အစီအစဉ်တွေကို "အရပ်ဘက် လူမှုအဖွဲ့အစည်းတွေအပေါ် နိုင်ငံရေးအရ ရည်ရွယ်ချက်ရှိရှိ တိုက်ခိုက်မှု" အဖြစ် ရှုတ်ချခဲ့ပါတယ်။

OSF နဲ့ အခြား ပရဟိတ အဖွဲ့အစည်းတွေအပေါ် ပြန်လည်စတင်လာတဲ့ တိုက်ခိုက်မှုဟာ "တရားမဝင်တဲ့ အဓိက ရည်ရွယ်ချက်" နဲ့ လှုပ်ရှားနေတဲ့ အဖွဲ့အစည်းတွေကို ပစ်မှတ်ထားပြီး ၂၀၂၅ ခုနှစ်တုန်းက ထရမ့် လက်မှတ်ရေးထိုးခဲ့တဲ့ သမ္မတ အမိန့်အပေါ် အစိတ်အပိုင်းလိုက် အခြေခံထားတာ ဖြစ်ပါတယ်။ အမေရိကန် အခွန်ဥပဒေကို အလွဲသုံးစားလုပ်နေတယ်လို့ သံသယရှိရတဲ့ အဖွဲ့အစည်းတွေကို အကြီးစား စစ်ဆေးမှု ပြုလုပ်ဖို့ အခွန်ဌာနက အခုပြင်ဆင်နေပြီလို့ သတင်းရင်းမြစ် သုံးခုက ပြောကြားခဲ့ပါတယ်။

ဒီစုံစမ်းစစ်ဆေးမှုဟာ ကော်ပိုရိတ်ဆန့်ကျင်ရေးနဲ့ အလုပ်သမားရေးရာ လှုံ့ဆော်ရေး အဖွဲ့အစည်း အမျိုးမျိုးကိုလည်း ပစ်မှတ်ထားတယ်လို့ သိရပါတယ်။ ဌာနတွင်း တာဝန်ရှိသူတွေဟာ ဒီစုံစမ်းစစ်ဆေးမှုတွေနဲ့ ပတ်သက်လာရင် "အရိုးကို ကိုက်ထားတဲ့ ခွေးတစ်ကောင်လို" အပြတ် မလျှော့ပေးဘဲ ဆောင်ရွက်နေကြပြီး၊ အဖွဲ့အစည်း အများအပြားနဲ့ သူတို့ရဲ့ အလှူရှင်တွေဟာ "အချိန်မရွေး အရေးယူခံရတော့မယ့် အခြေအနေ" မှာ ရောက်ရှိနေပြီလို့ သတင်းရင်းမြစ်တစ်ခုက ပြောခဲ့ပါတယ်။

REF: RT

#News #Myanmar