မဲဆောက်မှာ တရားမဝင်မှတ်ပုံတင် ကတ်တွေထုတ်ပေးနေတဲ့ အဖွဲ့တစ်ခုကို စတင်ဖမ်းပြီ

ဩဂုတ် - ၅

ထိုင်းနိုင်ငံ၊ တာ့ခ်ခရိုင်၊ မဲဆောက်မြို့မှာ နိုင်ငံခြားသားတွေကို တရားမဝင် မှတ်ပုံတင်ကတ်တွေ ထုတ်ပေးနေတဲ့ လိမ်လည်မှုကွန်ရက်တစ်ခုကို ထိုင်းအာဏာပိုင်တွေက ဖမ်းဆီးဖော်ထုတ်လိုက်ပြီး သံသယရှိသူ ၁၁ ယောက်ကို ဖမ်းဆီးလိုက်ပါတယ်။ ဒီကွန်ရက်ကနေ တရားမဝင် ကတ်ထုတ်ယူသွားသူ လူပေါင်း ၇၀၀ ကျော် အထိ ရှိနိုင်တယ်လို့ စုံစမ်းစစ်ဆေးသူတွေက ခန့်မှန်းထားကြပါတယ်။

ဩဂုတ်လ ၄ ရက်နေ့မှာ စတင်ခဲ့တဲ့ ဒီစစ်ဆင်ရေးဟာ "Zero-status" လို့ခေါ်တဲ့ (နိုင်ငံသားစိစစ်ခွင့် မရှိသေးသူများ ကတ်) တွေကို တရားမဝင် ထုတ်ပေးနေတဲ့ အဂတိလိုက်စားမှုတွေကို အဓိက နှိမ်နင်းခဲ့တာပါ။ ဌာနဆိုင်ရာ ဝန်ထမ်းတွေနဲ့ ပွဲစားတွေ ပူးပေါင်းပြီး နိုင်ငံခြားသားတွေကို မသမာတဲ့ နည်းလမ်းတွေနဲ့ ကတ်ရအောင် လုပ်ပေးခဲ့ကြတာ ဖြစ်တယ်လို့ အာဏာပိုင်တွေက ပြောပါတယ်။

ဒီစစ်ဆင်ရေးကိုတော့ နိုင်ငံတော် လုံခြုံရေးဆိုင်ရာ ပြစ်မှုတွေကို အပြတ်အသတ် နှိမ်နင်းဖို့ ဝန်ကြီးချုပ်နဲ့ ပြည်ထဲရေးဝန်ကြီး အနုတင် ချန်ဗီရာကူးလ်  ရဲ့ မူဝါဒအတိုင်း ထိုင်းရဲတပ်ဖွဲ့၊ ပြည်ထဲရေးဝန်ကြီးဌာနနဲ့ ပူးပေါင်းအဖွဲ့အစည်းတွေက စုပေါင်းပြီး ဆောင်ရွက်ခဲ့ကြတာ ဖြစ်ပါတယ်။

ဒီစစ်ဆင်ရေးကို အမျိုးသားရဲတပ်ဖွဲ့ချုပ် အရာရှိကြီး ရဲဗိုလ်ချုပ်ကြီး ကစ်ထရတ် ဖန်းဖက် နဲ့ နိုင်ငံဖြတ်ကျော် ပြစ်မှုဆိုင်ရာနဲ့ တရားမဝင် လူဝင်မှုကြီးကြပ်ရေး နှိမ်နင်းရေးစခန်းရဲ့ ညွှန်ကြားရေးမှူး၊ ဒုတိယ အမျိုးသားရဲတပ်ဖွဲ့ချုပ် အရာရှိကြီး ရဲဗိုလ်ချုပ်ကြီး ဆမ်ရန် နွမ်မ တို့က အဓိက ဦးဆောင်ခဲ့ကြတာပါ။

ပါဝင်တဲ့ အဖွဲ့အစည်းတွေထဲမှာ ပုဂ္ဂလိကအုပ်ချုပ်ရေးဌာနရဲ့ DOPA N.I.C.E. စစ်ဆင်ရေးအဖွဲ့၊ အထူးစုံစမ်းစစ်ဆေးရေးဌာန (DSI)၊ ငွေကြေးခဝါချမှု တိုက်ဖျက်ရေးရုံး (AMLO)၊ ပြည်သူ့ကဏ္ဍ အဂတိလိုက်စားမှု တိုက်ဖျက်ရေးကော်မရှင်ရုံး (PACC) နဲ့ တခြား သက်ဆိုင်ရာ အာဏာပိုင် အဖွဲ့အစည်းတွေ ပါဝင်ပါတယ်။

"တရားမဝင် ၁၀ နှစ်ကတ် နှိမ်နင်းရေး" လို့ အမည်ပေးထားတဲ့ မဲဆောက်မြို့ စစ်ဆင်ရေးဟာ အရင်က ပြုလုပ်ခဲ့တဲ့ တရားမဝင် မှတ်ပုံတင်ပြုလုပ်မှု စုံစမ်းစစ်ဆေးရေး စစ်ဆင်ရေးတွေကနေ ဆက်စပ်ပြီး ဆောင်ရွက်ခဲ့တာ ဖြစ်တယ်လို့ သိရပါတယ်။ 

REF: The Nation

#MNP #News