ပခုက္ကူ၊ ဩဂုတ် ၃၀
မကွေးတိုင်းဒေသကြီး၊ ပခုက္ကူမြို့၊ အမှတ်(၁၀)ရပ်ကွက်၊ မဟာဝိသုတာရာမ(အလယ်)တိုက် ဦးစီးပဓာန မဟာနာယက နိုင်ငံတော်ဩဝါဒစရိယဆရာတော် ဘဒ္ဒန္တပညာဇောတ(အဘိဓဇမဟာရဋ္ဌဂုရု) သက်တော် ၈၁နှစ်၊ သိက္ခာ ၆၁ရှိ မဟာထေရ် မြတ်ကြီး၏ အန္တိမအဂ္ဂိဈာပနအခမ်းအနား(မီးသင်္ဂြိုဟ်ကွင်းပူဇော်)ကျင်းပမည့် ကွင်းပြင်နေရာအား ယမန်နေ့ကစတင်ပြီး ရှင်း လင်းဆောင်ရွက်လျက်ရှိကြောင်း အခမ်းအနားပြင်ဆင်ရေးဆပ်ကော်မတီထံက သိရသည်။
ဆရာတော်ကြီးသည် သာသနာတော်အကျိုးကို သယ်ပိုးဆောင်ရွက်တော်မူရင်း ၁၃၈၈ခုနှစ်၊ ဝါခေါင်လဆန်း ၁၃ရက် (၂၆-၈-၂၀၂၆) ဗုဒ္ဓဟူးနေ့ နံနက် ၄နာရီတွင် ဘဝနတ်ထံပျံလွန်တော်မူခဲ့ခြင်းဖြစ်ပြီး ခရိုင်/မြို့နယ်စီမံခန့်ခွဲရေးနှင့် အုပ်ချုပ်ရေး ကော်မတီဥက္ကဋ္ဌများနှင့်အဖွဲ့ဝင်များ၏ဦးဆောင်မှုဖြင့် ခရိုင်သာသနာရေးဦးစီးဌာန၊ ဩဝါဒစရိယဆရာတော်ကြီးများ၊ ဌာနဆိုင် ရာများ၊ ဂေါပကအဖွဲ့ဝင်များ၊ မြို့မိမြို့ဖများ၊တပည့်သာဝကများစုပေါင်း၍ အန္တိမအဂ္ဂိဈာပနအခမ်းအနားအတွက် လုပ်ငန်း ညှိနှိုင်းအစည်းအဝေးခေါ်ယူကျင်းပကာ ဩဝါဒစရိယဆရာတော်ကြီးများအဖွဲ့ဦးစီးကော်မတီ၊ အန္တိမအဂ္ဂိဈာပနအခမ်းအနား ကျင်းပရေးကော်မတီ၊ အခမ်းအနားပြင်ဆင်ရေးဆပ်ကော်မတီ၊ ဘဏ္ဍာငွေရှာဖွေရေးဆပ်ကော်မတီ၊ အန္တိမအဂ္ဂိဈာပနပို့ဆောင် ရေးဆပ်ကော်မတီ၊ ကျန်းမာရေးဆပ်ကော်မတီ၊ လှူဖွယ်ဝတ္ထုနှင့်ဆွမ်းဆက်ကပ်ရေးဆပ်ကော်မတီ၊ ပြန်ကြားရေးဆပ်ကော်မတီ၊ လုံခြုံရေးနှင့်စည်းကမ်းထိန်းသိမ်းရေးဆပ်ကော်မတီတို့ကိုဖွဲ့စည်း၍ လုပ်ငန်းတာဝန်များပေးအပ်ခဲ့ကြောင်း၊ ဆရာတော်ကြီး၏ အန္တိမအဂ္ဂိဈာပနအခမ်းအနားကို ၂၀၂၆ခုနှစ်၊ စက်တင်ဘာလ ၄ရက်နေ့တွင် ကျင်းပသွားမည်ဖြစ်ပြီး အခမ်းအနားကျင်းပမည့် ကွင်းပြင်နှင့်လမ်းတစ်လျှောက်မြေနေရာများရှိ သစ်ကိုင်းသစ်ခက်များ၊ ချုံနွယ်မြက်ပင်များ၊ အမှိုက်သရိုက်များအား ရှင်းလင်း ဖယ်ရှားခြင်း၊ ကြိုတင်ပြင်ဆင်ခြင်းများ ဝိုင်းဝန်းဆောင်ကြကြောင်း သိရသည်။
ဘာမီသာ(ပခုက္ကူ)
#News #Myanmar
No comments:
Post a Comment