ထိုင်းနိုင်ငံက မြန်မာနယ်စပ် လုံခြုံရေးကို တိုးမြှင့်ချထား

 

မကြာသေးမီက ဖြစ်ပွားခဲ့သည့် မငြိမ်မသက်မှုများကြောင့် ထိုင်း-မြန်မာနယ်စပ်တစ်လျှောက် လုံခြုံရေးကို အားဖြည့်ရန် ထိုင်းစစ်တပ်က တပ်ဖွဲ့ဝင်များနှင့် စစ်ဘက်ဆိုင်ရာ ပစ္စည်းကိရိယာများကို ချထားလိုက်ပြီ ဖြစ်ကြောင်း၊ ထို့အပြင် နေပြည်တော်သို့ တရားဝင် ကန့်ကွက်စာများကိုလည်း ပေးပို့ထားကြောင်း ထိုင်းအမျိုးသားလုံခြုံရေးကောင်စီ (NSC) အကြီးအကဲက နိုဝင်ဘာ ၃ရက်နေ့က ပြောကြားသည်။

ထိုင်းအမျိုးသားလုံခြုံရေးကောင်စီ (NSC) အတွင်းရေးမှူးချုပ် ဗိုလ်ချုပ် ချိုင်ပရွတ် ဒေါင်းပရာပတ် (Gen. Chaipruak Doungprapat) က မတည်မငြိမ်ဖြစ်နေသည့် နယ်စပ်အခြေအနေ၊ အထူးသဖြင့် ထိုင်းနိုင်ငံ၊ တာ့ခ် (Tak) ခရိုင်၊ မဲဆောက်မြို့နယ်နှင့် မျက်နှာချင်းဆိုင်ရှိ မြန်မာနိုင်ငံ၊ မြဝတီမြို့နယ်အတွင်း ဖြစ်ပွားနေသည့် အခြေအနေများနှင့် ပတ်သက်၍ စိုးရိမ်ပူပန်မှုများ မြင့်တက်လာခြင်းအပေါ် ရှင်းလင်းပြောကြားခဲ့သည်။

လုံခြုံရေးတပ်ဖွဲ့များသည် သတ်မှတ်ထားသော လုပ်ထုံးလုပ်နည်းများနှင့် NSC ၏ ဆုံးဖြတ်ချက်များအတိုင်း ဆောင်ရွက်လျက်ရှိကြောင်း အတည်ပြုပြောကြားရင်း "တပ်မတော်အနေဖြင့် သတ်မှတ်ထားသည့် နေရာများတွင် တပ်ဖွဲ့များကို ချထားရန် ပြင်ဆင်ထားပြီး၊ တပ်ဖွဲ့ဝင်များကိုလည်း လိုအပ်သည့် စစ်ဘက်ဆိုင်ရာ ပစ္စည်းကိရိယာများ တပ်ဆင်ပေးထားပြီး ဖြစ်သည်" ဟု ၎င်းက ဆိုသည်။

ပဋိပက္ခများ ပိုမိုဆိုးရွားလာခြင်း မရှိစေရန် တားဆီးပေးဖို့ မြန်မာအာဏာပိုင်များထံ တိုက်တွန်းထားသည့် တရားဝင် ကန့်ကွက်စာများနှင့် အကြောင်းကြားစာများကို နိုင်ငံခြားရေးဝန်ကြီးဌာန၊ ထိုင်းတော်ဝင်တပ်မတော်နှင့် NSC တို့မှတစ်ဆင့် ပေးပို့ထားပြီး ဖြစ်သည်။

ထို့အပြင် မကြာသေးမီက ဖြစ်ပွားခဲ့သည့် ဖြစ်ရရပ်များကြောင့် ဒေသခံများ ထိခိုက်နစ်နာမှုများအပေါ် ကူညီကယ်ဆယ်ရေးနှင့် လျော်ကြေးပေးအပ်ရေး ကိစ္စရပ်များကို ပြည်ထဲရေးဝန်ကြီးဌာနက စီစဉ်ဆောင်ရွက်လျက်ရှိကြောင်း ၎င်းက ဖြည့်စွက်ပြောကြားသည်။

နယ်စပ်တစ်လျှောက် အန္တရာယ်များသည့် ဇုန်များတွင် နေထိုင်သူများအတွက် အရေးပေါ်အခြေအနေ ပေါ်ပေါက်လာပါက ချက်ချင်း အကောင်အထည်ဖော်နိုင်မည့် ဘေးလွတ်ရာသို့ ရွှေ့ပြောင်းရေး အစီအစဉ်များကိုလည်း ပြင်ဆင်ထားပြီး ဖြစ်သည်။

ထိုင်းနိုင်ငံ၏ သံတမန်ရေးရာ ကန့်ကွက်မှုများအပေါ် မြန်မာဘက်မှ တုံ့ပြန်ဆောင်ရွက်မှုများနှင့် ပတ်သက်သည့် စိုးရိမ်ပူပန်မှုများကို ဖြေကြားရာတွင်၊ ထိုင်းစစ်ဦးစီးချုပ် ဗိုလ်ချုပ်ကြီး ဥခရစ် ဘွန်တာနွန် (Gen. Ukrit Boontanont) သည် မြန်မာစစ်သံမှူးနှင့် မကြာသေးမီက တွေ့ဆုံခဲ့ကြောင်း၊ ထိုတွေ့ဆုံမှုတွင် မြန်မာစစ်သံမှူးက မြေပြင်ရှိ တပ်ဖွဲ့များနှင့် ညှိနှိုင်းဆောင်ရွက်ပေးမည်ဟု ကတိပြုခဲ့ကြောင်း ဗိုလ်ချုပ် ချိုင်ပရွတ်က ပြောကြားသည်။

မြန်မာအာဏာပိုင်များနှင့် ပူးပေါင်းဆောင်ရွက်မှုမှာ ယေဘုယျအားဖြင့် ကောင်းမွန်သော်လည်း နယ်စပ်အနီး ဆက်လက်ဖြစ်ပွားနေသည့် တိုက်ပွဲများကြောင့် စစ်ရေးအရ စိန်ခေါ်မှုများ ရှိနေကြောင်း NSC အကြီးအကဲက ထောက်ပြပြောဆိုသည်။

"ပူးပေါင်းဆောင်ရွက်မှုများ ရှိနေသော်လည်း နယ်စပ်ဒေသရှိ တပ်ဖွဲ့ဝင်များအနေဖြင့် အထူးသတိထား ဆောင်ရွက်ကြရန် လိုအပ်ပါတယ်... လက်နက်ကြီးများ အသုံးပြုသည့်အခါ ပစ်မှတ်လွဲချော်မှုသည် ဒီဂရီအနည်းငယ် သို့မဟုတ် မီလီမီတာ အနည်းငယ်မျှသာ ရှိလျှင်ပင်၊ ပစ်ခတ်လိုက်သော လက်နက်ကြီးကျည်များသည် နယ်စပ်ကိုကျော်လွန်၍ ထိုင်းနိုင်ငံပိုင်နက်အတွင်းသို့ ကျရောက်သွားနိုင်ပါသည်" ဟု ချိုင်ပရွတ် (Chaipruak) က ပြောကြားခဲ့သည်။

ထိုင်းစစ်တပ်အနေဖြင့် ဖြစ်လာနိုင်သည့် ခြိမ်းခြောက်မှုများကို ကြိုတင်တားဆီးရန်နှင့် နယ်စပ်တစ်လျှောက်ရှိ ထိုင်းနိုင်ငံသားများ၏ လုံခြုံရေးကို ကာကွယ်စောင့်ရှောက်ရန်အတွက် တင်းကျပ်သော ကြိုတင်ကာကွယ်ရေး အစီအမံများကို ချမှတ်ဆောင်ရွက်ထားကြောင်း ၎င်းက ထပ်လောင်းပြောကြားခဲ့သည်။

Ref - Thai PBS

#News #Myanmar