ရုရှား - အိန္ဒိယ - အီရန် ကုန်သွယ်ရေး လမ်းကြောင်း စင်္ကြံအတွက် လက်မှတ်တွေ ရေးထိုးကြပြီ

နိုဝင်ဘာ - ၈ ( တနင်္ဂနွေနေ့ ) 

ရုရှားနဲ့ အိန္ဒိယကို ချိတ်ဆက်ပေးမယ့် အဓိက ကုန်သွယ်ရေးစင်္ကြံပေါ်က စီစဉ်ထားတဲ့ မီးရထား လမ်းကြောင်းအတွက် အင်ဂျင်နီယာဆိုင်ရာ တိုင်းတာစစ်ဆေးမှုတွေ ဆက်လုပ်နိုင်ဖို့ သဘောတူညီချက်တွေ လက်မှတ်ရေးထိုးခဲ့ပြီဖြစ်ကြောင်း ရုရှား ဒုတိယဝန်ကြီးချုပ် အန်ဒရေး နီကီတင် က ကြာသပတေးနေ့မှာ ပြောကြားလိုက်ပါတယ်။

ရုရှားကုမ္ပဏီ ကတ်စပီယံဆားဗစ် နဲ့ အီရန်နိုင်ငံရဲ့ ဆောက်လုပ်ရေးနဲ့ သယ်ယူပို့ဆောင်ရေး အခြေခံ အဆောက်အအုံ ဖွံ့ဖြိုးတိုးတက်ရေးကုမ္ပဏီ (CDTIC) တို့ဟာ တီဟီရန်မြို့မှာ မြေယာဝင်ရောက်ခွင့် ပရိုတိုကောအပြင် ရှိပြီးသား စာချုပ်တစ်ခုအတွက် ဖြည့်စွက်သဘောတူညီချက်ကိုပါ လက်မှတ်ရေးထိုး ခဲ့ကြပါတယ်။ အဲဒီစာရွက်စာတမ်းတွေအရ ရှက်ရှ် -အက်စတာရာ  လမ်းကြောင်း တစ်လျှောက်လုံးမှာ အင်ဂျင်နီယာဆိုင်ရာ တိုင်းတာစစ်ဆေးမှုတွေကို ဆက်လက် လုပ်ဆောင်သွားနိုင်မှာ ဖြစ်ပါတယ်။

ရှက်ရှ်-အက်စတာရာ မီးရထားလမ်းဟာ ရုရှား၊ အိန္ဒိယ၊ အီရန်နဲ့ အခြားနိုင်ငံတွေကို မီးရထား၊ ကားလမ်းနဲ့ ရေကြောင်းလမ်းတွေနဲ့ ချိတ်ဆက်ပေးထားတဲ့ ကုန်စည်ပို့ဆောင်ရေးကွန်ရက်ဖြစ်တဲ့ နိုင်ငံတကာ မြောက်-တောင် သယ်ယူပို့ဆောင်ရေးစင်္ကြံ  ရဲ့ အနောက်ဘက် အပိုင်းခွဲမှာ လိုအပ်နေသေးတဲ့ ဆက်ကြောင်းတစ်ခု ဖြစ်ပါတယ်။

ဒီမီးရထားလမ်းဟာ အီရန်ရဲ့ ရှိပြီးသား မီးရထားကွန်ရက်ကို အဇာဘိုင်ဂျန်နိုင်ငံနဲ့ ရုရှားနိုင်ငံတို့ဆီ ဆက်သွယ်ပေးမှာဖြစ်ပြီး ပါရှန်ပင်လယ်ကွေ့နဲ့ မြောက်ဥရောပကြားမှာ ပိုမိုဆက်စပ်နေတဲ့ ကုန်စည်ပို့ဆောင်ရေးလမ်းကြောင်းတစ်ခုကို ဖန်တီးပေးမှာ ဖြစ်ပါတယ်။

၁၆၂ ကီလိုမီတာ ရှည်လျားမယ့် မီးရထားလမ်းထဲက ကျန်ရှိနေတဲ့ ၃၇ ကီလိုမီတာကို ဖေဖော်ဝါရီလ တုန်းက ပထမဆုံး ၁၂၅ ကီလိုမီတာ လွှဲပြောင်းပေးခဲ့ပြီးနောက် အီရန်နိုင်ငံက ဗုဒ္ဓဟူးနေ့မှာ လွှဲပြောင်းပေးခဲ့တယ်လို့ အီရန် လမ်းပန်းဆက်သွယ်ရေးနဲ့ မြို့ပြဖွံ့ဖြိုးတိုးတက်ရေး ဒုတိယဝန်ကြီး ဟူးရှန်း ဘက်ဇ်ဗန်း  က ပြောကြားခဲ့ပါတယ်။

ရုရှားကျွမ်းကျင်သူတွေအနေနဲ့ လေကြောင်းမှ တိုင်းတာစစ်ဆေးမှုတွေကို ပြီးစီးခဲ့ပြီဖြစ်ပြီး နောက်ထပ် အင်ဂျင်နီယာဆိုင်ရာ လေ့လာမှုတွေကိုလည်း ဆက်လက်လုပ်ဆောင်နေပြီဖြစ်ကြောင်း နီကီတင်က ပြောကြားခဲ့ပါတယ်။ အဖွဲ့ ၁၀ ဖွဲ့ဟာလည်း အဆိုပါလမ်းကြောင်းတစ်လျှောက်မှာ မြေကျောက် လေ့လာရေး တူးဖော်မှုတွေကို လုပ်ဆောင်နေတယ်လို့ သိရပါတယ်။

ရုရှားနဲ့ အီရန်တို့ဟာ ဒီမီးရထားလမ်းကို တည်ဆောက်ဖို့အတွက် ၂၀၂၃ ခုနှစ် မေလမှာ သဘောတူညီချက် လက်မှတ်ရေးထိုးခဲ့ကြပေမဲ့ လုပ်ငန်းသုံး တည်ဆောက်ရေး စာချုပ်အပြီးသတ် ကိုတော့ ဆက်လက် လုပ်ဆောင်ဆဲ အနေအထားမှာ ရှိပါတယ်။ အဲဒီသဘောတူညီချက်ကို အပြီးသတ်ဖို့အတွက် အီရန်ကိုယ်စားလှယ်အဖွဲ့ဟာ မော်စကိုမြို့ကို လာရောက်ဖို့ ရှိနေတယ်လို့ ကူဇ်မင်က ပြောကြားခဲ့ပါတယ်။

REF: RT

#News #Myanmar