ပွင့်ဖြူမြို့နယ်၌ နိုင်ငံ့စီးပွားမြှင့်တင်ရေးရန်ပုံငွေစီမံကိန်းဖြင့် နွေစပါးသီးနှံလျာထားဧက အောင်မြင်စွာ စိုက်ပျိုးနိုင်ရေး ဒေသခံတောင်သူများအား တွေ့ဆုံဆွေးနွေး အသိပညာပေး

MNP  -   ဇန်နဝါရီ ၂၄

မကွေးတိုင်းဒေသကြီး၊ ပွင့်ဖြူမြို့နယ်၌ လာမည့် နွေသီးနှံစိုက်ပျိုးရာသီတွင် နိုင်ငံ့စီးပွားမြှင့်တင်ရေးရန်ပုံငွေ စီမံကိန်းဖြင့် နွေစပါးသီးနှံလျာထားဧက အောင်မြင်စွာ စိုက်ပျိုးသွားနိုင်ရန်နှင့် ဒေသခံတောင်သူများ အချိန်မီစိုက်ပျိုးနိုင်ရေး တောင်သူအသိပညာပေး တွေ့ဆုံဆွေးနွေးခြင်းကို ယမန်နေ့ မွန်းလွဲ ၁ နာရီက ပွင့်ဖြူမြို့နယ် ဖလံတောကျေးရွာ ရွာလယ်ဓမ္မာရုံတွင် ကျင်းပသည်။

တောင်သူပညာပေး ဆွေးနွေးပွဲတွင် ဦးစွာ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးအောင်မြတ်ခိုင်က နိုင်ငံတော်အစိုးရမှ ဒေသခံတောင်သူများ သီးနှံဝင်ငွေတိုးပွားစေရန်၊  ဆန်စပါး စားနပ်ရိက္ခာဖူလုံစေရေး အရည်အသွေး ကောင်းမွန်သော ဆန်စပါးများ ပိုမိုစိုက်ပျိုးထုတ်လုပ်နိုင်ရန်အတွက် ယခုနှစ်တွင် မိမိတို့မြို့နယ်၌ နိုင်ငံ့စီးပွားမြှင့်တင်ရေးရန်ပုံငွေ စီမံကိန်းဖြင့် နွေစပါးစိုက်ဧက တစ်သောင်းခွဲ အကောင်အထည်ဖော် စိုက်ပျိုးထုတ်လုပ်သွားမည်ဖြစ်၍ ဒေသခံတောင်သူများကိုလည်း နွေစပါးအချိန်မီ စိုက်ပျိုးနိုင်ရေး မဲဇလီရေလွှဲဆည်မှ ဖေဖော်ဝါရီ ၁၅ ရက်နေ့ကစပြီး စိုက်ပျိုးရေ စနစ်တကျ ဖြန့်ဝေပေးသွားမှာဖြစ်ကြောင်း၊ ယခု စီမံကိန်းရန်ပုံငွေဖြင့် နွေစပါးစိုက်ပျိုးတောင်သူများကို တစ်ဦးလျှင် စိုက်ပျိုးစရိတ်နှင့် သွင်းအားစုပစ္စည်းကုန်ကျစရိတ်အတွက် ငွေကျပ်(၂)သိန်းနှုန်း ထုတ်ချေးပြီး စိုက်ပျိုးထုတ်လုပ်သွားမှာဖြစ်ကြောင်းနှင့် မိမိတို့ တောင်သူများအနေဖြင့် နွေစပါးစိုက်ပျိုးရေးနှင့် ပတ်သက်ပြီး ဖြည့်ဆည်းဆောင်ရွက်ပေးရမည့် ကိစ္စရပ်များရှိပါက တင်ပြဆွေးနွေးပေးစေလိုကြောင်း ရှင်းလင်းပြောကြားသည်။

ဆက်လက်၍ မြို့နယ်စိုက်ပျိုးရေးဦးစီးဌာန မြို့နယ်ဦးစီးမှူး ဒေါ်မိုးမိုးဝေက နွေစပါးသီးနှံစိုက်ပျိုးရာတွင် သီးနှံအထွက်နှုန်းကောင်းမွန်ရေး လိုက်နာဆောင်ရွက်ရမည့် စိုက်ပျိုး ရေးနည်းစနစ်များနှင့် သွင်းအားစုပစ္စည်း သုံးစွဲနည်းစနစ်များကို အသိပညာပေး ရှင်းလင်းဆွေးနွေး ပြောကြားသည်။

ထို့နောက် တက်ရောက်လာသည့် ဒေသခံတောင်သူများက နိုင်ငံ့စီးပွားမြှင့်တင်ရေးရန်ပုံငွေဖြင့် လျာထားနွေစပါး စိုက်ဧက အောင်မြင်စွာ စိုက်ပျိုးနိုင်ရေးအတွက် စိုက်ပျိုးရေနှင့် သီးနှံအောင်ရေ အဆင်ပြေစွာ ဖြန့်ဝေပေးရေး၊ သီးနှံအထွက်နှုန်းကောင်းမွန်ရေး တောင်သူပညာပေးလုပ်ငန်းများ ဖြည့်ဆည်းဆောင်ရွက်ပေးရေးကိစ္စရပ်များကို အကြံပြု ဆွေးနွေးတင်ပြရာ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် တာဝန်ရှိသူများက ဆွေးနွေးတင်ပြချက်အပေါ် ပေါင်းစပ်ညှိနှိုင်း ဆောင်ရွက်ပေးခဲ့ကြောင်း သိရသည်။  

ပွင့်ဖြူမြို့နယ်တွင် ယခုနှစ် နွေသီးနှံစိုက်ပျိုးရာသီ၌ နိုင်ငံ့စီးပွားမြှင့်တင်ရေးရန်ပုံငွေဖြင့် နွေစပါးစိုက်ဧက ၁၅၀၀၀ ဧက စိုက်ပျိုးထုတ်လုပ်ခြင်းကို ကျေးရွာအုပ်စု ၂၀ အုပ်စုမှ ဒေသခံတောင်သူဦးရေ ၅၂၇၃ ဦး၏ စပါးစိုက်လယ်မြေ ကွင်းပေါင်း ၇၉ ကွင်းတွင် အကောင်အထည်ဖော် စိုက်ပျိုးထုတ်လုပ်သွားမည်ဖြစ်ကြောင်း သိရပြီး တစ်မြို့နယ်လုံး နွေစပါးစိုက်ဧကအနေဖြင့် ၂၉၅၄၈ ဧက စိုက်ပျိုးဆောင်ရွက်သွားမည်ဖြစ်ကြောင်း ပွင့်ဖြူမြို့နယ်စိုက်ပျိုးရေးဦးစီးဌာနရုံးမှ သိရသည်။   

လှိုင်ဝင်းလေး 

 https://t.me/MyanmarNationalPost