နေပြည်တော်၊ ဇန်နဝါရီ ၃၁
နိုင်ငံသားတိုင်းသည် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီ ညွတ်မှုမပြိုကွဲရေးနှင့် အချုပ်အခြာအာဏာတည်တံ့ခိုင်မြဲရေးဟူသည့် ဒို့တာဝန်အရေး သုံးပါးကို စောင့်ထိန်းရန်တာဝန်ရှိသဖြင့် ယင်းတာဝန်များကိုထမ်းဆောင်နိုင်ရန် အတွက် နိုင်ငံသားတိုင်းစစ်ပညာသင်ကြားရန်နှင့် နိုင်ငံတော်ကာကွယ်ရေးအတွက် စစ်မှုထမ်းဆောင်နိုင်ရန် ပြည်သူ့စစ်မှုထမ်းဥပဒေကို ၂၀၂၄ ခုနှစ်၊ ဖေဖော်ဝါရီလ ၁၀ ရက်တွင် စတင်အာဏာတည်ခဲ့ပြီး နိုင်ငံတော်ကာကွယ်ရေးနှင့်လုံခြုံရေးတာဝန်များကို ထမ်းဆောင်ရန် စိတ်အားထက်သန်စွာ လာရောက်စာရင်းပေးသွင်းကြသည့် လူငယ် များကို ပြည်သူ့စစ်မှုထမ်းသင်တန်းများ ဖွင့်လှစ်သင်ကြားပေးလျက်ရှိသည်။
ယခုအခါ ပြည်သူ့စစ်မှုထမ်းသင်တန်း အမှတ်စဉ်(၇)သင်တန်းဆင်းပွဲ အခမ်း အနားများကို ယနေ့နံနက်ပိုင်းတွင် တိုင်းစစ်ဌာနချုပ်များအလိုက် နယ်မြေခံသင်တန်း ကျောင်းအသီးသီးတွင် ကျင်းပပြုလုပ်ကြသည်။ အဆိုပါ သင်တန်းဆင်းပွဲများကို သင်တန်းဆင်းစစ်ရေးပြ အစီအစဉ်အတိုင်းဆောင်ရွက်ကြပြီး သင်တန်းသားများက နိုင်ငံတော်အလံကိုကိုင်၍ ကတိသစ္စာခံယူကြသည်။
ထို့နောက် သင်တန်းကျောင်းများအလိုက် သင်တန်းဆင်းထူးချွန်ဆုများ ဖြစ်သည့် စံပြတပ်သားဆု၊ စစ်ရေးပြထူးချွန်ဆု၊ လက်ဖြောင့်တပ်သားဆု၊ စစ်သည်တော် ကျင့်ဝတ်ဆု၊ မိုင်းကျွမ်းကျင်ဆု၊ တပ်စိတ်တိုက်နည်း ပထမဆု၊ ချေမှုန်းရေးပထမဆု၊ အိပ်ဆောင်အကောင်းဆုံးဆု ရရှိသူများအား တာဝန်ရှိသူများက ဆုများအသီးသီး ပေးအပ်ချီးမြှင့်ပြီး သင်တန်းဆင်းအမှာစကားများ ပြောကြားကြသည်။
သင်တန်းဆင်းပွဲအခမ်းအနားများအပြီးတွင် သင်တန်းဆင်းပွဲသို့ တက်ရောက် ကြသော နေပြည်တော်ကောင်စီဥက္ကဋ္ဌ၊ တိုင်းဒေသကြီးနှင့် ပြည်နယ်ဝန်ကြီးချုပ်များ၊ တိုင်းမှူးများနှင့် တာဝန်ရှိသူများက သင်တန်းကျောင်းခန်းမများ၌ ပြည်သူ့စစ်မှုထမ်း သင်တန်းအမှတ်စဉ်(၇)မှ သင်တန်းဆင်း နိုင်ငံ့သားကောင်းစစ်သည်များအား တွေ့ဆုံ အမှာစကားပြောကြားကာ ရင်းရင်း နှီးနှီးလိုက်လံနှုတ်ဆက်အားပေးကြသည်။
အဆိုပါ ပြည်သူ့စစ်မှုထမ်းသင်တန်းအမှတ်စဉ်(၇)ကို ၂၀၂၄ ခုနှစ်၊ နိုဝင်ဘာ ၂၆ ရက်တွင် စတင်ဖွင့်လှစ်ခဲ့ခြင်းဖြစ်ပြီး သင်တန်းကာလအတွင်း ကြံ့ခိုင်ရေးဘာသာရပ်၊ စစ်ရေးပြဘာသာရပ်၊ စစ်နည်းဗျူဟာဘာသာရပ် စသည့် ဘာသာရပ်များနှင့် အထွေထွေ ဘာသာရပ်များကိုလည်း ရက်သတ္တပတ်အလိုက် အဆင့်ဆင့်လေ့ကျင့်သင်ကြား ခဲ့ကြကြောင်း သိရှိရသည်။
ဖွဲ့စည်းပုံအခြေခံဥပဒေ(၂၀၀၈ ခုနှစ်)၊ ပုဒ်မ-၃၈၅ တွင် နိုင်ငံတော်၏ လွတ်လပ်ရေး၊ အချုပ်အခြာအာဏာနှင့် နယ်မြေတည်တံ့ခိုင်မြဲရေးအတွက် ကာကွယ် စောင့်ရှောက်ရေးသည် နိုင်ငံသားတိုင်းတွင်တာဝန်ရှိသည်ဟု ပြဋ္ဌာန်းထားပြီး ပုဒ်မ-၃၈၆ တွင် နိုင်ငံသားတိုင်းသည် ဥပဒေပြဋ္ဌာန်းချက်များနှင့်အညီ စစ်ပညာသင်ကြားရန် နှင့် နိုင်ငံတော်ကာကွယ်ရေးအတွက် စစ်မှုထမ်းဆောင်ရန် တာဝန်ရှိသည်ဟု ပြဋ္ဌာန်း ထားသည်။ နိုင်ငံတော်အနေဖြင့် ဖွဲ့စည်းပုံအခြေခံဥပဒေအရ နိုင်ငံသားများ၏ အခွင့် အရေးကို ကာကွယ်စောင့်ရှောက်ပေးလျက်ရှိပြီး နိုင်ငံသားများအနေဖြင့်လည်း နိုင်ငံ့ တာဝန်များကို ထမ်းဆောင်ကြရမည်ဖြစ်သည်။ ယင်းတာဝန်များကို ကျေပွန်စွာထမ်း ဆောင်ရန်ဆန္ဒရှိကြသည့် နိုင်ငံ့သားကောင်းများသည် ပြည်သူ့စစ်မှုထမ်းသင်တန်းများ တက်ရောက်ကာ နိုင်ငံတော်ကာကွယ်ရေးနှင့်လုံခြုံရေးတာဝန်များကို ထမ်းဆောင်နေ ကြပြီဖြစ်သည်။
ယနေ့တွင် သင်တန်းဆင်းခဲ့ကြသည့် ပြည်သူ့စစ်မှုထမ်း နိုင်ငံ့သားကောင်း စစ်သည်များသည်လည်း အဖွဲ့အစည်းဖြင့် စည်းစနစ်ကျစွာလုပ်ကိုင် ဆောင်ရွက်တတ် သည့် အလေ့အကျင့်များ(TeamWork)ရရှိခဲ့ပြီး နိုင်ငံချစ်စိတ်(Nationalism)၊ မျိုးချစ်စိတ်(Patriotism)၊ အဖွဲ့အစည်းစိတ်(Team Sprit)၊ ရဲဘော်ရဲဘက်စိတ်(esprit de corps) အပြည့်ဖြင့် တာဝန်ကျရာ တပ်ရင်း၊ တပ်ဖွဲ့ အသီးသီးသို့ သွားရောက်၍ နိုင်ငံတော် ကာကွယ်ရေးနှင့် လုံခြုံရေးတာဝန်များကို ဂုဏ်ယူစွာ ထမ်းဆောင်ကြတော့ မည်ဖြစ်သည်။
ပြည်သူ့စစ်မှုထမ်းသင်တန်းအမှတ်စဉ်(၇)တွင် တက်ရောက်ခဲ့ရသည့် အတွေ့ အကြုံများ၊ သင်တန်းမှရရှိခဲ့သည့် အလေ့အကျင့်ကောင်းများ၊ ယုံကြည်ချက်၊ ခံယူချက် များနှင့် သင်တန်းဆင်းပြီးနောက် မိမိတို့တာဝန်ကျရာတပ်ရင်း၊ တပ်ဖွဲ့များ၌ ဆက်လက် တာဝန်ထမ်းဆောင်သွားမည့် အခြေအနေများနှင့်ပတ်သက်၍ သင်တန်းဆင်း နိုင်ငံ့ သားကောင်းစစ်သည်များ၏ စကားသံများကိုလည်း ယခုလိုပဲ ကြားသိရပါတယ်
(၁) သင်တန်းသားတစ်ယောက် အနေနဲ့ ဘယ်လိုဆက်ပြီး တာဝန်ထမ်းဆောင် သွားမလဲဆိုရင် အခုလို သင်ကြားပို့ချပေးတဲ့ ပညာရပ်တွေကို လက်တွေ့အကျိုး ရှိရှိအသုံးချပြီးတော့ ကျွန်တော်တို့ မြန်မာနိုင်ငံနဲ့ ကျွန်တော်တို့လူမျိုးတွေကို ဆက်လက်ပြီးတော့ ကျရာနေရာဒေသတွေမှာ ပေးအပ်တဲ့တာဝန်တွေကို ကျေပွန်စွာနဲ့ ထမ်းဆောင်သွားမယ်လို့ ပြောကြားချင်ပါတယ်။
(၂) ကျွန်တော်ကတော့ ဒီသင်တန်းမှာ လက်ဖြောင့်ဆုရရှိခဲ့တာပါ။ ကြိုးစား သင်ယူမှုကတော့ ကျွန်တော်တို့ နည်းပြတွေ ပြောထားတဲ့အတိုင်း လိုက်နာဆောင်ရွက်ဖို့ပဲ လိုပါတယ်။ နည်းပြတွေ အနေနဲ့မှန်ကန်တဲ့ နည်းလမ်းကို ကျွန်တော်တို့ကို ရှေ့ဆောင်ပို့ခဲ့တဲ့အတွက် ကျွန်တော်တို့ကလည်း ကောင်းကောင်းမွန်မွန် လိုက်နာဆောင်ရွက်ဖို့ အရေးကြီးပါတယ်။ စရောက်တုန်းကတော့ သူငယ်ချင်းမရှိလို့ စိတ်ညစ်မှုတွေ စိတ်ဖိစီးမှုတွေ များတာပေါ့။ အခုနောက်ပိုင်း တစ်ပတ် နှစ်ပတ်ကြာတော့ သူငယ်ချင်း အသစ်တွေနဲ့ ကိုယ့်အိပ်ဆောင်နဲ့ကိုယ် နေရတော့ သင်တန်းမှာနေရတာ ကျွန်တော်ပျော်ရွှင်လာပါတယ်။ တော်တော်လေးလည်းပျော်ခဲ့ပါတယ်။ စရောက် လာတုန်းကတော့ မိသားစုနဲ့ခွဲရတော့ ဝမ်းနည်းသလို အခုကျတော့ သူငယ် ချင်းတွေနဲ့ ခွဲရမယ်ဆိုတော့ အရမ်းပဲဝမ်းနည်းမိပါတယ်။ အဓိကကတော့ မိမိဆန္ဒသဘောအတိုင်း ဝင်လာတာဖြစ်ပါတယ်။ အရပ်သားစိတ်ဓာတ်နဲ့တော့ တော်တော်ကြီး ကွာခြားသွားတာပေါ့နော်။ ကျွန်တော်အရင်ကဆို ပေါ့ပေါ့နေ ပေါ့ပေါ့စားတယ်။ ဟိုသွားမယ် ဒီသွားမယ် အလုပ်လုပ်မယ်။ အိမ်ရောက်ရင် စားမယ်သောက်မယ်ဒီလောက်ပဲ သိခဲ့တာပါ။ အခုတပ်မတော်ထဲ ရောက်လာ တော့ စည်းကမ်းပိုင်းတွေဘာတွေ တော်တော် ရင့်ကျက်လာတယ်။ အသိဉာဏ် တွေပိုပြီး ဖွံ့ဖြိုးလာတယ်ပေါ့ အဲ့တာကိုကျွန်တော် ခံယူမိပါတယ်။ ကိုယ့်ကို ကိုယ်လည်း ဂုဏ်ယူမိပါတယ်။
ထို့နောက် ညပိုင်းတွင် သင်တန်းကျောင်းအသီးသီး၌ ပြည်သူ့စစ်မှုထမ်း သင်တန်းအမှတ်စဉ်(၇)မှ နိုင်ငံ့သားကောင်းစစ်သည်များကို သင်တန်းဆင်းဂုဏ်ပြု ညစာစားပွဲများပြုလုပ်ခဲ့ကြကြောင်း သတင်းရရှိသည်။
#MNP #News
Join - https://t.me/MyanmarNationalPost
No comments:
Post a Comment