နောင်မွန်း ၊ ဒီဇင်ဘာ ၉
ကချင်ပြည်နယ် ပူတာအိုခရိုင် နောင်မွန်းမြို့နယ်တွင် ရဝမ်စာပေနှင့်ယဉ်ကျေးမှုအသင်းကကြီးမှူး၍ အမျိုးသားရေးစိတ်ဓါတ်မြှင့်မာလာပြီး စည်းလုံးညီညွတ်မှုပိုမိုခိုင်မာလာစေရန်နှင့် အမျိုးဘာသာသာသနာနှင့် စာပေယဉ်ကျေးမှုကို တန်ဖိုးထားတတ်စေရန်ရည်ရွယ်၍ (၇၆) နှစ်မြောက်ရဝမ်အမျိုးသားနေ့အခမ်းအနားကို ဒီဇင်ဘာလ ၉ ရက်နံနက် ၁၁ နာရီတွင် ရဝမ်စာပေနှင့်ယဉ်ကျေးမှုအသင်းရုံးဝင်း၌ မြို့နယ်လုံးကျွတ်ပါဝင်စုပေါင်းကာ စည်းကားသိုက်မြိုက်စွာကျင်းပသည်။
အခမ်းအနားတွင် ပထမဦးစွာသင်းအုပ်ဆရာဦးဝဒမ်းခေါင်ဖုန်ရမ်၏ဆောင်မှုဖြင့် အဖွင့်ဝတ်ပြုဆုတောင်းခဲ့ကြပြီး မြို့နယ်စာပေနှင့်ယဉ်ကျေးမှုအသင်းဥက္ကဋ္ဌ ဦးမယစ်ဖုန်ရမ်က (၇၆) နှစ်မြောက်ရဝမ်အမျိုးသားနေ့အတွက် မြန်မာနိုင်ငံစာပေနှင့်ယဉ်ကျေးမှုအသင်းမှပေးပို့သည့် ရဝမ်အမျိုးသားနေ့သဝဏ်လွှာကို ဖတ်ကြားသည်။
ထို့နောက် မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးနမ်ရဲမင်က ရဝမ်အမျိုးသားနေ့အတွက် ဂုဏ်ပြုအမှာစကားပြောကြားပြီး ရဝမ်စာပေနှင့်ယဉ်ကျေးမှုအသင်းဒုတိယဥက္ကဋ္ဌ ဦးဆန်နိုင်ဒီးရှင်းက ရဝမ်အမျိုးသားနေ့ဖြစ်ပေါ်လာပုံနှင့် ရဝမ်လူမျိုးများ၏သမိုင်းကြောင်းကို ရှင်းလင်းပြောကြားခဲ့ကာ အခမ်းအနားသို့တက်ရောက်လာသူများက ရဝမ်ရိုးရာမနောတိုင်ရှေ့တွင် အောင်ပွဲခံအဇီလမ်အက (ခေါ်) ရဝမ်ရိုးရာမနောအကကို ပျော်ရွှင်စွာပါဝင်ဆင်နွဲကခဲ့ကြကြောင်း သတင်းရရှိသည်။
https://t.me/MyanmarNationalPost
No comments:
Post a Comment