မူလပိုင်ရှင်က ပြန်လည်ချထားပေးရန် တင်ပြထားပြီး စစ်ဆေးဆောင်ရွက်နေဆဲမြေယာပေါ်တွင် မသာမာသောနည်းဖြင့် ဂရန်ရရှိထားသူများက မြေများရှင်းလင်းခြံခတ်နေမှုကို တားမြစ်ပေးပါရန်လျှောက်ထားတင်ပြခြင်း (အိတ်ဖွင့်ပေးစာ)

ရန်ကုန်တိုင်းဒေသကြီး၊ ဒလမြို့နယ်၊ ကမာကဆစ်ရပ်ကွက်တွင် နေထိုင်သူ ကျွန်မဒေါ်လှလှသည် မိခင်ဒေါ်စိန်မြိုင် ပိုင်ဆိုင်သည့် ဒလမြို့နယ်၊ မှော်စက်ရပ်ကွက်ရှိ ကွင်းအမှတ်(၁၈၅) ဦးပိုင်အမှတ်(၂၁)ရှိ လယ်ဧက(၂၀)ကိုနိုင်ငံတော်အစိုးရမှ မြို့ပြစီမံကိန်းအတွက် သိမ်းဆည်းခဲ့ပါတယ်။

သမ္မတကြီး ဦးသိန်းစိန်လက်ထက်တွင် ညွှန်ကြားချက်အရ စီမံကိန်းဖေါ်ဆောင်ခြင်းမရှိသေးသည့် လစ်လပ်မြေများကို ပြန်လည်လျှောက်ထားဆဲမှာ၂၀၁၅ရွေးကောက်ပွဲအ စိုးရအပြောင်းအလဲဖြစ်ပေါ်ပြီး NLDပါတီအာဏာရသည့် အစိုးရသက်တမ်းတွင် ထပ်မံတင်ပြတောင်းဆိုခဲ့ပါတယ်။

တင်ပြမှု့နှင့်စပ်လျဉ်း၍ မြို့နယ်အထွေအထွေအုပ်ချုပ်ရေးရုံးမှ ခေါ်ယူစစ်ဆေးခြင်း၊ မြေပြင်ကွင်းဆင်းစစ်ဆေးခြင်းများ ဆောင်ရွက်ပြီး ရန်ကုန်မြို့တော်စည်ပင်တာဝန်ရှိသူ တစ်ဦးက မြို့နယ်ရုံးတွင် ခေါ်ယူတွေ့ဆုံပြီး ပြန်လည်စွန့်လွှတ်ပေး၍ မရကြောင်း ပြောဆိုသည့်အတွက် ပြန်လည်တင်ပြတောင်းဆိုမှုကို ရပ်ဆိုင်းခဲ့ပါတယ်။သို့သော်လည်းယခုအချိန်ထိ လစ်လပ်မြေ(၅)ဧကခန့်ပေါ်တွင် နိုင်ငံတော်မှ မည်သည့်စီမံကိန်းမှ ဆောင်ရွက်ထားခြင်းမရှိဘဲ မူလတောင်းခံသူကို ပြန်လည်ချထားခြင်းမရှိသည့်အပြင် အခြားသူတစ်ယောက်ကို ပါမစ်ချပေးလိုက်ခြင်းကြောင့် မြေကွက်များရိုက်ပြီး ရောင်းချနေကြောင်း သိရှိရ၍ နိုင်ငံတော်စီမံအုပ်ချပ်ရေးကောင်စီအစိုးရ လက်ထက်တွင် နိုင်ငံတော်အကြီးအကဲများနှင့်တကွ ရန်ကုန်တိုင်းဝန်ကြီးချုပ်ထံသို့ မူလပိုင်ရှင်ထံပြန်လည်ချထားပေးနိုင်ရန် ထပ်မံတင်ပြခဲ့ပါတယ်။

ထိုသို့ တင်ပြမှု့နှင့်စပ်လျှဉ်း၍ တွံတေးခရိုင်ရုံးမှ ခေါ်ယူစစ်ဆေးမေးမြန်းမှုများ လုပ်ဆောင်ခဲ့ပါသည်။ ခေါ်ယူစစ်ဆေးမေးမြန်းရာတွင် ရုံးခန်းတံခါးပိတ်ပြီး ကျွန်မတစ်ယောက်ထဲသာဝင်ရပြီး နစ်နာသူကျွန်မကို သူတို့မေးခွန်းတွေကို အမှန်တိုင်းပြောပါ၊ အမှန်တိုင်းမပြောဆိုက ကျွန်မကိုဖမ်းချုပ်ထားမယ်လို့ ခရိုင်မှူး ကပြောဆိုပြီးကျွန်မရဲ့ထွက်ဆိုချက်တွေကို ဖုန်းနဲ့ရိုက်မယ်ဆိုပြီး ကျွန်မကိုဖုန်းထောင်ပြပြီး ကျွန်မကိုမေးမြန်းနေစဉ် ဖုန်းထောင်ပြီးရိုက်နေပါတယ်/ အကွက်ရိုက်ရောင်းနေတယ်ဆိုတာ သက်သေပြနိုင်လား မေးတော့ ကျွန်မဖုန်းထုတ်ပြမယ်လုပ်တော့ လေလှိုင်းကဟာတွေ မပြနဲ့တရားမဝင်ဘူးပြောပါတယ်။ ယခုအခါတွင် ခရိုင်မှူးကို ပြခဲ့သော မှော်စက်ရပ်ကွက်၊ နီလာလမ်းE(1336) F(1336)ဂရပ်(၂)ခုစလုံး ဦးထွန်းအောင်ကျော် ၁၂/ကခက(နိုင်)၀၀၆၂၂၃ အမည်နဲ့ဂရမ်ကို၂၅-၇-၂၀၂၅နေ့မှာ ထုတ်လိုက်ပါတယ်။ ကျွန်မကို တွံတေးခရိုင်ရုံးကို ခေါ်တွေ့သောနေ့သည် ၂၂-၇-၂၀၂၅ နေ့ဖြစ်ပြီး ဂရန်ထုတ်ပေးသောနေ့သည် ၂၅-၇-၂၀၂၅နေ့ ဖြစ်နေပါတယ်။

ယခုအခါတွင် ထိုဂရန်ကိုကိုင်ဆောင်ထားသူသည် ကျွန်အမေစိုက်ထားသော အုန်းပင်များခုတ်လှဲ မြေညှိပြီး ခြံများခတ်ထားကြောင်း ဓါတ်ပုံနှင့် ဂရန်မိတ္တူကိုပါ သက်သေနှင့်တကွ တင်ပြပါတယ်။ နိုင်ငံတော် ယာယီသမ္မတကြီးနှင့် ရန်ကုန်တိုင်းဝန်ကြီးချုပ်ကြီးတို့ ကျွန်မရဲ့နစ်နာဆုံးရှုံးမှုကို ဥပဒေ လမ်းညွှန်ချက်များနှင့်အညီ အမှန်တရားအတိုင်း ဖြေရှင်းပေးနိုင်ပါရန် လေးစားစွာဖြင့် အသနားခံတင်ပြအပ်ပါတယ်။

လေးစားစွာဖြင့်

ဒေါ်လှလှ

#MNP #News #OpenLetter