ဟင်္သာတ၊ ဧပြီ ၈
မြန်မာသက္ကရာဇ် ၁၃၈၇ ခုနှစ်တွင် ကျရောက်မည့် ၂၀၂၆ ခုနှစ် မြန်မာ့ရိုးရာယဉ်ကျေးမှုအတာသင်္ကြန်ပွဲတော်အား ဟင်္သာတမြို့တွင် ခရိုင်အဆင့် စည်ကားသိုက်မြိုက်စွာ ကျင်းပသွားနိုင်ရေး ကြိုတင်ပြင်ဆင်လျက်ရှိကြောင်း သိရသည်။
ဟင်္သာတခရိုင် မြန်မာ့ရိုးရာယဉ်ကျေးမှု မဟာသင်္ကြန်ပွဲတော်ကျင်းပရေးဦးစီးကော်မတီ၏ ဦးဆောင်မှုဖြင့် နှစ်သစ်ကူးအတာသင်္ကြန်ပွဲတော်ကို ဧပြီလ (၁၃) ရက်၊ အကြိုနေ့မှ ဧပြီလ (၁၆) ရက် သင်္ကြန်အတက်နေ့အထိ ကျင်းပပြုလုပ်သွားမည်ဖြစ်သည်။ သင်္ကြန်ပွဲတော်တွင် ဗဟိုမဏ္ဍပ် ၁ ခု၊ ဌာနဆိုင်ရာရေကစားမဏ္ဍပ် ၃၇ ခု၊ သနပ်ခါး သင်္ကြန် ၁ ခု၊ ပြိုင်ပွဲဝင်ယိမ်း ၁၂ ဖွဲ့၊ ဖျော်ဖြေရေးယိမ်းအဖွဲ့ ၈ ဖွဲ့နှင့် စင်တင်တေးဂီတများဖြင့် စည်ကားသိုက်မြိုက်စွာကျင်းပသွားမည်ဖြစ်ရာ ဗဟိုမဏ္ဍပ်နှင့် ရေကစားမဏ္ဍပ်များ စတင်တည်ဆောက်နေမှုများ၊ လမ်းလျှောက်သင်္ကြန် ကြိုတင်ပြင်ဆင်နေမှုများ၊ ယိမ်းအကပြိုင်ပွဲများအတွက် သက်ဆိုင်ရာဌာနများ၊ အဆင့်မြင့်ကျောင်းများ၊ အခြေခံပညာကျောင်းများ၊ ရပ်ကွက်များမှ ယိမ်းအကပျိုဖြူများ လေ့ကျင့်နေမှုများဆောင်ရွက်လျက်ရှိကြောင်းသိရသည်။
မြန်မာ့ရိုးရာ မဟာသင်္ကြန်ပွဲတော်ကို တစ်နိုင်ငံလုံးအတိုင်းတာဖြင့် စည်ကားသိုက်မြိုက်စွာ ကျင်းပပြုလုပ်မည်ဖြစ်သည့်အတွက် ဟင်္သာတခရိုင်တွင်လည်း ယခင်နှစ်များထက်ပိုမို၍ မြန်မာ့ယဉ်ကျေးမှုအစဉ်အလာများနှင့်အညီ စည်ကားသိုက်မြိုက်စွာကျင်းပပြုလုပ်သွားမည်ဖြစ်ပြီး အကပြိုင်ပွဲများ၊ ဖျော်ဖြေရေးယိမ်းအဖွဲ့များ၊ သက်ကြီးပူဇော်ပွဲများ၊ မြန်မာနှစ်ဆန်း တစ်ရက်နေ့တွင် ဇီဝိတဒါနငါးလွတ်ပွဲများကိုလည်းဆောင်ရွက်သွားမည်ဖြစ်ပြီး ခရိုင်နှင့်မြို့နယ်အဆင့်ဌာနဆိုင်ရာတာဝန်ရှိသူများ၊ သက်ဆိုင်ရာကော်မတီဝင်များက မိမိတို့ကဏ္ဍများအလိုက်ကြိုတင်ပြင်ဆင်ဆောင်ရွက်လျက်ရှိကြောင်း သိရသည်။
#MNP #News
No comments:
Post a Comment