ဟော်မုဇ်ကိုပြန်ဖွင့်ဖို့ အမေရိကန်တွေ လိုက်နာရမယ့် အချက်အသစ်တွေကို အီရန်ဘက်က ထုတ်ပြန်

ဩဂုတ် - ၉ ( တနင်္ဂနွေနေ့ ) 

သင်္ဘောတွေအပေါ် တိုက်ခိုက်မှုတွေ ဆက်လက်ဖြစ်ပွားနေချိန်မှာ ဟော်မုဇ် ရေလက်ကြား ကို ပြန်လည်ဖွင့်လှစ်ပေးဖို့အတွက် အမေရိကန်ဘက်က လိုက်နာဆောင်ရွက်ရမယ့် အချက်သစ်တွေကို အီရန် အမျိုးသားလုံခြုံရေး ကောင်စီမြင့်က ထုတ်ပြန်တောင်းဆိုလိုက်ပါတယ်။

စနေနေ့တုန်းက အီရန် မီဒီယာတွေမှာ ဖော်ပြခဲ့တဲ့ အစီရင်ခံစာအရ ကောင်စီရဲ့ အတွင်းရေးမှူး မိုဟာမက် ဘာကာ ဇိုကာဒါ  က ကမ္ဘာ့ရေနံနဲ့ သဘာဝဓာတ်ငွေ့ (LNG) ရောလမ်းကြောင်းကုန်သွယ်မှုရဲ့ လေးပုံတစ်ပုံနီးပါးကို ကိုင်တွယ်နေတဲ့ ဒီရေလမ်းကြောင်းဟာ "အမေရိကန်ဘက်က ပြုမူဆောင်ရွက်ပုံတွေကို မပြောင်းလဲသရွေ့" ပြန်လည်ပွင့်လာမှာ မဟုတ်ဘူးလို့ ပြောကြားခဲ့ပါတယ်။

ဒါ့အပြင် အမေရိကန်အနေနဲ့ အီရန်ဆိပ်ကမ်းတွေကို ရေတပ်နဲ့ ပိတ်ဆို့ထားတာတွေကို ဖယ်ရှားပေးရမှာဖြစ်သလို "အီရန်ပတ်ဝန်းကျင် ဒေသတွေ" ကနေ တပ်ဖွဲ့တွေကို ရုပ်သိမ်းပေးရမယ်လို့ ဆိုပါတယ်။ ဒါ့အပြင် "မတရားသဖြင့် တရားမဝင်" ပိတ်ဆို့အရေးယူထားတာတွေကို ရုပ်သိမ်းပေးဖို့၊ ထိန်းချုပ်ထားတဲ့ နိုင်ငံပိုင်ပိုင်ဆိုင်မှုတွေကို ပြန်လည်ထုတ်ပေးဖို့နဲ့ လျော်ကြေးပေးလျော်ဖို့လည်း တောင်းဆိုထားပါတယ်။ ဒါ့အပြင် အီရန်နဲ့ အီရန်ရဲ့ မဟာမိတ်တွေဖြစ်ကြတဲ့ အီရတ်၊ လစ်ဘနွန်၊ ပါလက်စတိုင်းနဲ့ ယီမင်တို့အပေါ် "စစ်ပွဲနဲ့ ရန်လိုမှုတွေ" ကိုလည်း အမေရိကန်က အဆုံးသတ်ရမယ်လို့ ဖြည့်စွက်ပြောကြားခဲ့ပါတယ်။

ဇိုကာဒါ က "အမေရိကန်အနေနဲ့ ဘာသာစကား အမျိုးမျိုးနဲ့ အီရန်ကို ဘယ်တော့မှ ခြိမ်းခြောက်တာမျိုး မလုပ်ရသလို၊ အီရန်လူမျိုးတွေရဲ့ မွန်မြတ်တဲ့ တန်ဖိုးထားမှုတွေကိုလည်း စော်ကားတာမျိုး မလုပ်ရပါဘူး" လို့ ပြောဆိုခဲ့ပါတယ်။

စနေနေ့စောစောပိုင်းတုန်းကတော့ အာရပ်စော်ဘွားများပြည်ထောင်စု (UAE) ရဲ့ နိုင်ငံပိုင် ရေနံကုမ္ပဏီ ADNOC က မောင်းနှင်တဲ့ ရေနံတင်သင်္ဘောတစ်စီးကို အီရန်ဒုံးကျည် ထိမှန်ခဲ့တယ်လို့ UAE ဘက်က ပြောကြားခဲ့ပြီး တီဟီရန် (အီရန်) ကို ပင်လယ်ဓားပြလို ကျူးလွန်တယ်လို့ စွပ်စွဲခဲ့ပါတယ်။ အီရန်ဘက်ကတော့ ရေလက်ကြားကို ဖြတ်သန်းသွားလာနေတဲ့ သင်္ဘောအားလုံးဟာ ၎င်းတို့ရဲ့ ညွှန်ကြားချက်များကို လိုက်နာရမှာဖြစ်ပြီး အမေရိကန်ရေတပ်က သတ်မှတ်ထားတဲ့ "တရားမဝင်" လမ်းကြောင်းကို ရှောင်ရှားရမယ်လို့ အခိုင်အမာ ပြောဆိုထားပါတယ်။

သောကြာနေ့တုန်းက ဟော်မုဇ် ရေလက်ကြား ပူးတွဲထိန်းချုပ်စီမံဖို့ အိုမန်နိုင်ငံနဲ့ သဘောတူညီမှုရဖို့ နီးစပ်နေပြီလို့ အီရန်ဘက်က ပြောခဲ့ပေမဲ့ အမေရိကန်နဲ့ ငြိမ်းချမ်းရေး ဆွေးနွေးပွဲတွေကတော့ ရပ်တန့်သွားခဲ့ပါတယ်။ အမေရိကန်သမ္မတ ဒေါ်နယ်ထရမ့်ကတော့ ဆွေးနွေးပွဲတွေအတွက် လမ်းဖွင့်ပေးဖို့ ပြီးခဲ့တဲ့အပတ်က တိုက်ခိုက်မှုအသစ်တွေကို ဖျက်သိမ်းခဲ့တာလို့ ပြောကြားခဲ့ပါတယ်။ 

အီရန်ရဲ့ ဒီတောင်းဆိုချက်တွေဟာ အရှေ့အလယ်ပိုင်း ဒေသတစ်ခုလုံးမှာ ပိုမိုကြီးမားတဲ့ ရုပ်ပျက်ဆင်းပျက် ရုန်းရင်းဆန်ခတ်တွေ ဖြစ်လာမှာကို စိုးရိမ်နေကြစဉ်မှာထွက်ပေါ်လာတာပါ။ ဒီအပတ်ထဲမှာပဲ အစ္စရေးဟာ ဟစ်ဇဘိုလာအဖွဲ့အနေနဲ့ လွန်ခဲ့တဲ့ နှစ်လက လေဘနွန်အစိုးရနဲ့ ရရှိထားတဲ့ အပစ်အခတ်ရပ်စဲရေးကို ချိုးဖောက်တယ်လို့ စွပ်စွဲပြီး လေဘနွန်နိုင်ငံအပေါ် အပြင်းအထန် ဗုံးကြဲတိုက်ခိုက်မှုတွေကို ပြန်လည် စတင်ခဲ့ပါတယ်။ တစ်ချိန်တည်းမှာပဲ အီရန်လိုလားတဲ့ ရှီယိုက်အဖွဲ့တစ်ဖွဲ့ဖြစ်တဲ့ ယီမင်က ဟူသီတွေကလည်း ဆော်ဒီကျောထောက်နောက်ခံပြု အစိုးရတပ်ဖွဲ့တွေကို အကြီးအကျယ် ထိုးစစ်ဆင်ခဲ့သလို ပင်လယ်နီအတွင်းရှိ ဆော်ဒီသင်္ဘောတွေကိုပါ ပစ်မှတ်ထား တိုက်ခိုက်ခဲ့ကြပါတယ်။

REF: RT

#News #Myanmar