အေအိုင်က လူတိုင်းကိုသိပြီး လူတိုင်းက အေအိုင်မှန်းမသိ ဖြစ်လာတော့မယ်လို့ ဆို

ဩဂုတ် - ၁၀ ( တနင်္လာနေ့ ) 

အေအိုင် (AI) နည်းပညာဟာ နောက်ပိုင်းမှာ လူတွေရဲ့ ကိုယ်ရေးကိုယ်တာ ဘဝတွေအကြောင်း အရင်က မရှိခဲ့ဖူးတဲ့ ပမာဏအထိ အသေးစိတ် သိရှိသွားနိုင်တယ်လို့ အင်တာနက် စီးပွားရေးလုပ်ငန်းရှင် ကင်မ် ဒေါ့ကွန်း က သတိပေးလိုက်ပါတယ်။ ဒီနည်းပညာဟာ လူတစ်ဦးချင်းစီရဲ့ ကိုယ်ရေးအချက်အလက် ဧရာမပမာဏကို စုစည်းပြီး အလွန်အမင်း အသေးစိတ်ကျတဲ့ ကိုယ်ရေးမှတ်တမ်း  တွေကို ဖန်တီးတည်ဆောက်လာနိုင်တယ်လို့ သူက ဆိုပါတယ်။

ဒေါ့ကွန်းရဲ့ ပြောကြားချက်အရ ဒီနည်းပညာဟာ အမေရိကန်ရဲ့ ထောက်လှမ်းရေး/ဆန်းစစ်ရေး လုပ်ငန်းတွေကို အဆမတန် ကျယ်ပြန့်သွားစေနိုင်တယ်လို့ သိရပါတယ်။ ဒါ့အပြင် AI စနစ်တွေဟာ နိုင်ငံသားတွေရဲ့ အချက်အလက် အမြောက်အမြား သိမ်းဆည်းထားတဲ့ အစိုးရရဲ့ ဒေတာဘေ့စ်( အချက်အလက်သိုလှောင်တဲ့နေရာ)  တွေကိုပါ ဝင်ရောက်ကြည့်ရှုနိုင်စွမ်း ရရှိသွားနိုင်တယ်လို့လည်း သူက ဖြည့်စွက်ပြောပါတယ်။

"အမေရိကန်ရဲ့ ဒေတာဘေ့စ်တွေကိုပါ AI က ဝင်ကြည့်လို့ ရသွားမှာမို့လို့ ဒါဟာ အရမ်းကို အန္တရာယ်များပါတယ်၊ အဲဒီအခါကျရင် AI က လူတိုင်းအကြောင်း အကုန်လုံးကို သိသွားတော့မှာပါ" လို့ မီဂါအပ်လုပ် ဖိုင်မျှဝေရေး ဝန်ဆောင်မှုကို ဖန်တီးခဲ့သူက သောကြာနေ့က ထုတ်လွှင့်ခဲ့တဲ့ တက်ကား ကားလ်ဆန် နဲ့ အင်တာဗျူးမှာ ပြောကြားခဲ့တာဖြစ်ပါတယ်။

ဒီလို ဖြစ်လာတာမျိုးကို တားဆီးဖို့ နည်းလမ်း ရှိသလားလို့ မေးတဲ့အခါမှာတော့ ဒေါ့ကွန်းက "အေအိုင် (AI) မသုံးနဲ့၊ အင်တာနက် မသုံးနဲ့၊ ဒါပဲ နည်းလမ်း ရှိတယ်" လို့ တုံ့ပြန်ခဲ့ပါတယ်။

ဒီပြောဆိုချက်တွေဟာ အွန်လိုင်း ကိုယ်ရေးကိုယ်တာ လုံခြုံမှုနဲ့ အစိုးရရဲ့ ထောက်လှမ်းရေး လုပ်ငန်းတွေ အကြောင်း ဆွေးနွေးစဉ်မှာ ထွက်ပေါ်လာတာဖြစ်ပါတယ်။ အမေရိကန်အစိုးရဟာ ဖုန်းခေါ်ဆိုမှုတွေ၊ ဗီဒီယို ကောလ် တွေနဲ့ အခြား အွန်လိုင်း လှုပ်ရှားမှုတွေကိုပါ ဖမ်းယူနိုင်တဲ့ ဧရာမ ထောက်လှမ်းရေး စီမံကိန်းကြီးတွေကို လည်ပတ်ဆောင်ရွက်နေတယ်လို့လည်း သူက ဆက်လက် ပြောကြားခဲ့ပါတယ်။

ဒီအချက်အလက်တွေကို အသုံးပြုပြီး လူတွေရဲ့ ကိုယ်ရေးမှတ်တမ်းတွေကို ဖန်တီးတာ၊ သူတို့ကို အမျိုးအစား အလိုက် ခွဲခြားတာတွေ လုပ်ဆောင်နိုင်သလို၊ ရွေးကောက်ပွဲတွေနဲ့ စစ်ပွဲတွေအတွက် ထောက်ခံမှုရအောင် စည်းရုံးပွဲတွေမှာ လူထုကို စည်းရုံးသိမ်းသွင်းဖို့အထိပါ အသုံးချသွားနိုင်တယ်လို့ သူက ဆိုပါတယ်။

အမေရိကန်က ဘာလို့ ဒေတာစင်တာ တွေကို ဒီလောက်တောင် အများကြီး တည်ဆောက်နေရတာလဲဆိုတာနဲ့ ပတ်သက်လို့တော့ အမေရိကန်ဟာ အပြန်အလှန် ဆက်သွယ်မှု အချက်အလက်တွေ အပါအဝင် တစ်နေ့ကို ဒေတာ ပမာဏ ၁၀ ပီတာဘိုက် နီးပါး ရယူစုဆောင်းနေတာကြောင့် ဖြစ်တယ်လို့ ဒေါ့ကွန်းက အခိုင်အမာ ပြောခဲ့တာပါ။ "ဆက်သွယ်ရေး အချက်အလက်မှန်သမျှ အကုန်လုံးပါပဲ" လို့ သူက ဆိုပါတယ်။

ဒါ့အပြင် အေအိုင် (AI) ကဏ္ဍမှာ အမေရိကန်က အပြတ်အသတ် ဦးဆောင်နေတယ်ဆိုတဲ့ အယူအဆကိုလည်း ဒေါ့ကွန်းက ပယ်ချခဲ့ပြီး၊ တရုတ်နိုင်ငံဟာလည်း "အများကြီး နောက်ကျကျန်မနေဘူး" လို့ ပြောခဲ့သလို အဲ့ဒါနဲ့ ပတ်သက်ပြီး ဆန့်ကျင်ဘက် ပြောဆိုမှုတွေကိုလည်း ဝါဒဖြန့်မှုတွေပဲဖြစ်တယ်လို့ တုံ့ပြန်ခဲ့ပါတယ်။

REF: RT 

#News #Myanmar